އެއްގަމު އުޅަނދުތައް އިންޝުއަރ ކުރުމަށް އެލައިޑުން އިލެކްޓްރޯނިކް މޮޓޯ އިންޝުއަރެންސް ސްޓިކަރ ތަޢާރަފްކޮށްފިއެވެ.
އެއްގަމު އުޅަނދުތަކުގައި އިންޝުއަރެންސް ސްޓިކަރ ހިއްޕުމުގެ ބަދަލުގައި ސްމާޓް ފޯންތައް މެދުވެރިކޮށް ސްޓިކަރ ބެހެއްޓޭގޮތަށް އެލައިޑާއި ފުލުހުން ގުޅިގެން ތަޢާރަފްކުރި އިލެކްޓްރޯނިކް މޮޓޯ އިންޝުއަރެންސް ސްޓިކަރ ތަޢާރަފްކޮށްފައިވަނީ، މިއަދު އިސްކަންދަރު ކޮށީގައި ބޭއްވި ރަސްމިއްޔާތެއްގައެވެ.
މިރަސްމިއްޔާތުގައި ވާހަކަދައްކަވަމުން ޑެޕިއުޓީ ކޮމިޝަނަރ އޮފް ޕޮލިސް އަޙްމަދު ސައުދީ ވިދާޅުވީ، އެއްގަމު އުޅަނދުތަކުގައި ސްޓިކަރ ހިއްޕަން ނުޖެހޭގޮތަށް މި ޚިދުމަތް ޤާއިމުކުރުމަކީ ޢާންމު ރައްޔިތުންނަށް ފަސޭހަވާނެ ކަމެއްކަމަށާއި، މިއީ ސްޓިކަރ ގެއްލުން ފަދަ ކަންކަމާ ގުޅިގެން ދިމާވާ ދަތިތަކަށް ލިބިގެންދާނެ ޙައްލެއްކަމަށެވެ.
މި ރަސްމިއްޔާތުގައި ވާހަކަދައްކަވަމުން އެލައިޑް އިންޝުއަރެންސްގެ ޖެނެރަލް މެނޭޖަރ ރިޔާޒީ މުޙައްމަދު ވިދާޅުވީ، ޢާންމުންނަށް ލުއިފަސޭހަވާގޮތަށް ޚިދުމަތްތައް ބައްޓަންކުރުމަށް އެކުންފުނިން އިސްކަންދޭކަމަށެވެ.
އެލައިޑުން ބުނީ، އިލެކްޓްރޯނިކް އިންޝުއަރެންސް ސްޓިކަރ ތަޢާރަފްކުރެވުމާއެކު، ސައްޙަނޫންގޮތުގައި ސްޓިކަރ ތައްޔާރުކޮށް އޮޅުވާލުމުގެ ފުރުޞަތު މުޅިން ބަންދުވެގެންދާނެކަމަށެވެ.