މޯލްޑިވިއަން އައިޑަލް ސީޒަން ދޭއްގެ ގްރޭންޑް ފިނާލޭއަށް ދަތުރުކުރާނެ ގަދަ 3 ބައިވެރިން ކަނޑައެޅުމަށް އެސް.އެމް.އެސް ކުރުމުގެ ފުރުޞަތު ބެލުންތެރިންނަށް ހުޅުވާލައިފިއެވެ.
މޯލްޑިވިއަން އައިޑަލް ގާލާ ރައުންޑުގެ 8 ވަނަ ޝޯވ މިރޭ ޓީ.ވީ.އެމުން ގެނެސްދީފައިވާއިރު، މިރޭގެ ޝޯވގައި ގަދަ 5 ބައިވެރިންގެ ތެރެއިން ކޮންމެ ބައިވެރިއަކުވެސް ވަނީ ދެ ލަވައެއް ހުށައަޅާދީފައެވެ. މިރޭގެ ގާލާ ޝޯވގައި ބައިވެރިން ލަވަ ހުށައަޅާދީފައި ވަނީ 2 ތީމަކަށެވެ. އެއީ ލޯބީގެ ލަވަތަކަށާއި، ހަނދާނުން ފުހެލަން އެންމެ ރީތިލަވަތަކަށެވެ. މިރޭގެ ޝޯވގައި މި ދެ ތީމާއި ގުޅޭ ހިތްގައިމު އަދި ވާދަވެރި ރީތި ލަވަތަކެއް ބައިވެރިން ވަނީ ހުށައަޅާދީފައެވެ.
ގަދަ 5 ބައިވެރިންގެ ތެރެއިން ބެލުންތެރިންނަށް އެންމެ ކަމުދާ ހުށައެޅުމެއް ހުށައަޅައިދިން ބައިވެރިއަކަށް ވޯޓުލުމަށްޓަކާ އެސް.އެމް.އެސް ކުރުމުގެ ފުރުޞަތު މާދަމާ މެންދުރުފަހު 3 ޖެހުމާއި ހަމައަށްވަނީ ހުޅުވާލާފައެވެ. ވޯޓުލުމަށްޓަކާ، MI ޖެހުމަށްފަހު ހުސްތަންކޮޅެއް ދޫކޮށްފައި، އެ ބައިވެރިއެއްގެ ނަން ޖެހުމަށްފަހު 303 އަކަށް އެސް.އެމް.އެސް ކުރެވޭނެއެވެ. ބެލުންތެރިން މި ޝޯވއަށް ފޮނުވާ ކޮންމެ އެސް.އެމް.އެސްއަކަށް 3 ރުފިޔާ ޗާޖްކުރާނެއެވެ. އަދި ކޮންމެ ނަންބަރަކުންވެސް އެންމެ ގިނަވެގެން ފޮނުވޭނީ 50 އެސް.އެމް.އެސްއެވެ. މޯލްޑިވިއަން އައިޑަލްގެ ގާލާ ރައުންޑުގައި މިހާރު ވާދަކުރާ ގަދަ 5 ބައިވެރިންނަކީ:
- ޢަބްދުﷲ ހިޝާން
- ޝަމްވީލް މުޙައްމަދު
- މުޙައްމަދު ތަސްނީމް
- ޙަމޫދު އަޙްމަދު، އަދި
- ޢިބްރާހީމް ވަޙީދު
މިރޭގެ ޝޯވގައި ގެސްޓް ޖަޖެއްގެ ގޮތުގައި ބައިވެރިވެފައި ވަނީ ކުރިއަރަމުން އަންނަ ޒުވާން ލަވަކިޔުންތެރިޔާ ރިޝްވާން އައިމަން (ރިއްޓެ)އެވެ. ނޯ އެލިމިނޭޝަން ޕަވަރއާއެކު ގަދަ 5 ބައިވެރިންގެ ތެރެއިން އެއްވެސް ބައިވެރިއަކު ނުކަޓާ މިދިޔަ ހަފްތާގެ ޝޯއިން ސަލާމަތްވެފައިވާއިރު، މި ހަފްތާގެ ޝޯވ ވެގެންދާނީ މި 5 ބައިވެރިންނަށްވެސް ކުރިމަތިވާނެ އެންމެ ބޮޑު ޗެލެންޖަށެވެ. ސަބަބަކީ މި 5 ބައިވެރިންގެ ތެރެއިން ކޮންމެވެސް 2 ބައިވެރިއަކު، މިހަފްތާގެ ޝޯވއާއެކު މި މުބާރާތާއި ވަކިވާންޖެހޭނެތީއެވެ.
މިރޭގެ ޝޯވގައި ޕަރފޯމްކުރި ގަދަ 5 ބައިވެރިންގެ ތެރެއިން ޖަޖުންގެ 50 އިންސައްތަ މާކްސް އަދި ބެލުންތެރިން 50 އިންސައްތަ ވޯޓާއެކު، އެންމެ ގިނަ ޕޮއިންޓް ލިބޭ ބައިވެރިން ހިމެނޭހެން މޯލްޑިވިއަން އައިޑަލްގެ މިފަހަރުގެ ސީޒަންގެ ގްރޭންޑް ފިނާލޭއަށް ދަތުރުކުރާ ގަދަ 3 ބައިވެރިން ކަނޑައެޅުން އޮންނާނީ މާދަމާ ރޭ ބާއްވާ އެލިމިނޭޝަން ނައިޓުގައެވެ.