ރާއްޖޭގެ ތަރައްޤީއާއި ވިޔަފާރީގެ ދުވެލި ކުރިއަރައިގެންދާންވާނީ، ކޮރަޕްޝަނާ ނުލައިކަމަށް ރައީސުލްޖުމްހޫރިއްޔާގެ ނާއިބު ޢަބްދު ﷲ ޖިހާދު ވިދާޅުވެއްޖެއެވެ. ނާއިބުރައީސް މިހެން ވިދާޅުވީ، ފުރަތަމަ ޤައުމީ އެންޓި-ކޮރަޕްޝަން މަހާސިންތާ އިފްތިތާޙްކޮށްދެއްވައި ވާހަކަފުޅުދައްކަވަމުންނެވެ.
އެންޓި-ކޮރަޕްޝަން ޤައުމީ މާހާސިންތާ އިފްތިތާޙްކޮށްދެއްވައި ވާހަކަފުޅުދައްކަވަމުން ނާއިބު ރައީސް ޢަބްދު ﷲ ޖިހާދު ވިދާޅުވީ، މިއިން ދުވަހަކުވެސް ހިންގާފައި ނުވާފަދަ ތަރައްޤީގެ ބޮޑެތި މަޝްރޫޢުތައް ސަރުކާރުން ރާއްޖޭގައި ކުރިއަށް ގެންދަވާއިރު، އެއިން އެއްވެސް ކަމެއްގައި ކޮރަޕްޝަންގެ ޢަމަލެއް ހިންގުމަކީ ސަރުކާރުން ތަރުޙީބުދެއްވާ ކަމެއް ނޫންކަން މީގެ ކުރިން ރައީސުލްޖުމްހޫރިއްޔާ ޢަބްދު ﷲ ޔާމީން ޢަބްދުލްޤައްޔޫމް ހާމަކުރައްވާފައިވާނޭ ކަމަށެވެ.
ރައީސުލްޖުމްހޫރިއްޔާ ޢަބްދު ﷲ ޔާމީން ޢަބްދުލްޤައްޔޫމް ކޮރަޕްޝަންއާ ދެކޮޅަށް ޢާންމުކުރައްވާފައި ސިޔާސަތު ފާހަގަކުރައްވަމުން ރައީސުލްޖުމްހޫރިއްޔާގެ ނާއިބު ވިދާޅުވީ، ރާއްޖެއަށް ތަރައްޤީ އަންނަން ޖެހޭނީ ކޮރަޕްޝަނާ ނުލާކަމަށާއި، ކޮރަޕްޝަނަށް މަގުފައިވާ ކަންކަމާއި އެފަދަ ޢަމަލުތައް ހިންގާ ފަރާތްތަކާމެދު ސަރުކާރުން އެއްވެސް ޖެހިލުމެއްނެތި ފިޔަވަޅު އަޅުއްވަމުން ގެންދަވާނެ ކަމަށެވެ.
ޖިނާޢީ ޢަދުލުގެ ނިޒާމުގެ ތެރެއިން ކޮރަޕްޝަންގެ މައްސަލަތަކަށް އަވަސް ޙައްލު ހޯދައި ތަންފީޒީ އިދާރާތަކަށް ކުރިމަތިވެފައިވާ މައްސަލަތައް ދެނެގަނެ ކޮރަޕްޝަންގެ މައްސަލަތައް އަވަހަށް ނިންމުމުގައި ޢިލްމީ އަދި ތަންފީޒީ ނަޒަރަކުން ގޮތްތަކެއް ހޯދަންޖެހިފައިވާ ދަނޑިވަޅެއްގައި އެންޓި-ކޮރަޕްޝަން ކޮމިޝަނާޢި، އިސްލާމީ ޔުނިވަރސިޓީ ގުޅިވަޑައިގެން މި ބާއްވަވާ މަހާސިންތާގެ މުހިއްމުކަން ފާހަގަކުރައްވަމުން ނާއިބު ރައީސް ވިދާޅުވީ، ކޮރަޕްޝަން ނައްތާލުމުގައި ޤައުމީ ފެންވަރުގައި މަޝްވަރާކޮށް، ޙައްލު ހޯދުމަކީ މުޖުތަމަޢަށް އެންމެ ފައިދާ ހުރިގޮތް ކަމަށެވެ. އަދި ދައުލަތަށް ގެއްލިގެންދާ ފައިސާއާއި މުދާ ހޯދުމުގައި އައު ގޮތްތަކެއް މި މަހާސިންތާގެ ސަބަބުން ހޯދައި އައު ވިސްނުންތަކެއް ހޯދިގެންދާނެ ކަމަށް އުންމީދުކުރައްވާ ކަމުގައި ވިދާޅުވިއެވެ.
ކޮރަޕްޝަން ހުއްޓުވުމާއި، މަނާކުރުމުގައި ޖިނާޢީ ޢަދުލުގެ ނިޒާމް ހަރުދަނާކޮށް އިންސާނީ ވަޞީލަތްތައް ބިނާކުރުމުގައި ދޭންޖެހޭ އެންމެހާ އެހީތެރިކަމާއި އެއްބާރުލުން ސަރުކާރުން ދެއްވާނެކަމުގެ ޔަޤީންކަން ރައީސުލްޖުމްހޫރިއްޔާގެ ނާއިބު ޢަބްދު ﷲ ޖިހާދު މިއަދު ވަނީ ދެއްވާފައެވެ.