ދެހާސް ބަސްތާ ކާރޑް ހިފައިގެން ދަތުރުކުރި ކޮޅުވެއްޓިއެއް ފަރަށް އަރައިފިއެވެ.
އެމް.އެން.ޑީ.އެފުން ވިދާޅުވީ 2000 ބަސްތާ ކާޑު ހިފައިގެން މާލެއިން ފުރައިގެން ބ.އޭދަފުއްޓަށް ދަތުރުކުރަމުން ދަނިކޮށް ފަރަށް އަރާފައިވަނީ "ކަނޑުހާ" ނަކަމަށް ކިޔާ އެސް.ޓީ.އޯގެ ކޮޅުވެއްޓިއެއްކަމަށެވެ.
ފަރަށް އެރި ކޮޅުވެއްޓީގައި 6 މީހުން ތިބިކަމަށާ އެއެންމެންނަކީވެސް ދިވެހިންކަމަށް އެމްއެންޑިއެފުން ވިދާޅުވެއެވެ. އަދި މިޙާދިސާގައި އެއްވެސް މީހަކަށް އަނިޔާއެއް ވެފައިނުވާކަމަށްވެސް އެމް.އެން.ޑީ.އެފުން މައުލޫމާތުދެއްވައެވެ.
މި ކޮޅުވެއްޓި އަރާފައިވަނީ މާލެއަތޮޅު ހުވަފެންފުށި ދެކުނުފަރާތު ފަރަށެވެ. މި ޙާދިސާގެ މައުލޫމާތު އެމް.އެން.ޑީ.އެފަށް ލިބިފައިވަނީ މިއަދު ހެނދުނު 9 ޖެހިއިރު ކަމަށް އެމް.އެން.ޑީ.އެފުން މައުލޫމާތުދެއްވައެވެ. މި ޙާދިސާގައި ކޮޅުވެއްޓީގައިހުރި މުދަލަށް އެއްވެސް ގެއްލުމެއް ލިބިފައި ނުވާކަމަށާއި، ކޮޅުވެއްޓި ފުންކުރުމުގެ މަސައްކަތް މިހާރު އެސް.ޓީ.އޯއިން ކުރަމުންދާކަމަށް ވެސް އެމް.އެން.ޑީ.އެފުން މައުލޫމާތުދެއްވައެވެ.