ސްރީލަންކާގައި ޑެންގީ ހުމުގައި 300 މީހުން މަރުވެފައިވާކަމަށް އިންޓަނޭޝަނަލް ފެޑަރޭޝަން އޮފް ރެޑް ކްރޮސް އެންޑް ރެޑް ކްރެސެންޓް (އައި.އެފް.އާރ.ސީ) އިން ބުނެފިއެވެ. އެ ޖަމާޢަތުން ބުނަނީ، 3000 މީހުން ޑެންގީ ހުމަށް ޕޮޒިޓިވްވެފައިވާކަމަށެވެ.
ސްރީލަންކާ ސަރުކާރުން ބުނާގޮތުން ޑެންގީ ހުން ކޮންޓްރޯލް ކުރުމަށްޓަކައި އެގައުމުންވަނީ ބޭރުގެ އެހީއަށް އެދިފައެވެ. އަދި ޑެންގީ އަކީ މަދިރީގެ ޒަރިއްޔާއިން ފެތުރޭ ބައްޔަކަށްވާތީ، މަދިރި ކޮންޓްރޯލްކުރުމާއި ސިއްހަތާބެހޭ މުވައްޒަފުންނާއި ތަޖުރިބާކާރުންނަށް އެހީތެރިވުމަށްޓަކައި ސިފައިންގެ އެތަށް ހާސްބަޔަކު ހަރަކާތްތެރިވަމުންދާކަމަށެވެ.
ސްރީލަންކާގެ އިތުރުން އަވަށްޓެރި އިންޑިޔާގެ ކެރެލާގައިވެސް ޑެންގީ ހުން ވަރަށް ބޮޑަށް ފެތުރި އަށްޑިހަ އަށްވުރެ ގިނަމީހުންވަނީ މަރުވެފައެވެ.
ނަމަވެސް ކެރެލާގައި މިހާރު ޑެންގީ ކޮންޓްރޯލް ކުރެވިފައިވާކަމަށް އެ ސްޓޭޓްގެ ސަރުކާރުން ބުނެއެވެ. ދެހާސް ދިހަވަނަ އަހަރާއި ދެހާސް ސޯޅަ ވަނަ އަހަރުވެސް ސްރީލަންކާގައި ޑެންގީ ހުން ފެތުރުނެވެ. ނަމަވެސް މިހާރު ފެތުރެމުންދާ މިންވަރާ ގާތަށްވެސް އެ ދެ ފަހަރު ޑެންގީ ފެތުރިފައި ނުވާކަމަށް އައި.އެފް.އަރ.ސީން ބުނެއެވެ.