ކުޅުދުއްފުށީ މަގުތައް ރަނގަޅު ފެންވަރަކަށް ހެދުމަށް ހިންގާ މަޝްރޫޢުގެ ދަށުން ފަނޑިޔާރުމަގުގައި ތާރައެޅުމުގެ މަސައްކަތް ފަށައިފިއެވެ.
މަގުހެދުމުގެ ގިނަ މަޝްރޫޢުތަކެއް ރާއްޖޭގެ އެކި ކަންކޮޅުތަކުގައި ދަނީ ހިނގަމުންނެވެ. އެންމެ ބާރަށް މި މަސައްކަތް ކުރާ އެއްރަށަކީ ހދ ކުޅުދުއްފުށްޓެވެ. މޯލްޑިވްސް ރޯޑް ޑިވެލޮޕްމެންޓް ކޯޕަރޭޝަނާއި ހަވާލުކޮށްގެން ކުރިއަށްގެންދާ މި މަސައްކަތުގެ ދަށުން މިހާރު ކުރިއަށްދަނީ މަގުތަކުގައި ތާރައެޅުމުގެ މަސައްކަތެވެ.
ތާރުއެޅުމުގެ މަސައްކަތް ފަށާފައިވަނީ ކުޅުދުއްފުށި މަގާމް މަގުގައެވެ. މަގާމް މަގުގެ ތިންބައިކުޅަ ދެބައިގެ މަސައްކަތް ނިމިފައިވާއިރު މިހާރު ތާރައެޅުމުގެ މަސައްކަތް ކުރިޔަށްދަނީ ފަނޑިޔާރު މަގުގައެވެ. އެމްއާރުޑީސީ ކުޅުދުއްފުށީ ސައިޓްގެ މެނޭޖަރ މުހައްމަދު ހަސަން ވިދާޅުވީ މޫސުން ގޯސްވުމުގެ ސަބަބުން މަސައްކަތަށް ދަތިތަކެއް ކުރިމަތިވިޔަސް މޫސުން ތަންދޭ މިންވަރަކުން މަސައްކަތް ކުރިޔަށްދާކަމަށެވެ.
ކުޅުދުއްފުށީ މަގުހެދުމުގެ މަޝްރޫޢުގައި 18 މަގެއް ރަނގަޅު ފެންވަރުގައި ތަރައްޤީކޮށް ތާރު އެޅުމަށް ހަމަޖެހިފައިވާއިރު ގިނަ މަގުތަކެއްގައި ތާރައެޅުމުގެ ކުރިން ކުރަންޖެހޭ މަސައްކަތްތައް މިހާރުވަނީ ނިމުމަކާ ގާތްވެފައެވެ. މި ގޮތުން ސީއެސްބީ ލޭޔަރާ ކާބްސްޓޯން ގެ ގިނަ މަސައްކަތް ވަނީ ނިމިފައެވެ. ކުޅުދުއްފުށީގެ ފަހެއްޕޮއިންޓް އަށެއް ކިލޯމީޓަރު މަގުގައި ތާރައެޅުމަށް ހަމަޖެހިފައިވާއިރު މިއީ ދައުލަތުގެ ބަޖެޓުން ފަސްދޮޅަސް މިލިޔަނަށްވުރެ ގިނަ ރުފިޔާ ހަރަދުކޮށްގެން ހިންގާ މަޝްރޫޢެކެވެ.
މި މަޝްރޫޢުގެ ދަށުން އެރަށު މަގުތަކުގައި ފެންބޮޑުވުމަށް ދިމާވާ މައްސަލަ ޙައްލުކުރުމަށް ދެ ޕަމްޕް ސްޓޭޝަން ހެދުމަށް ހަމަޖެހިފައިވާއިރު މި ސިސްޓަމްތަކަކީ ކާނުތައް ފުރިގެން އިތުރުވާފެން މޫދައް ބޭރުކުރެވޭގޮތަށް ހަދާ ޕަމްޕް ސްޓޭޝަންތަކެކެވެ.
އެމްއާރްޑީސީގެ ޢަމާޒަކީ ކުޅުދުއްފުށީ މަގުހެދުމުގެ މަޝްރޫޢު މިއަހަރުގެ ނިޔަލަށް ނިންމުމެވެ.