ދެކުނު ސޫދާންގައި ހިނގަމުންދާ ހަނގުރާމައިގެ ސަބަބުން އެކެއް ޕޮއިންޓް ދޭއް މިލިޔަން މީހުން ހައިހޫނުކަން ތަހައްމަލުކުރަމުން ގެންދާކަމަށް އދން ބުނެފިއެވެ.
އިންސާނީ އެހީގެ ކަންތައްތަކާބެހޭ އދގެ ވަކީލު މާކް ލުކޮކް ވިދާޅުވީ، ދެކުނު ސޫދާންގައި ހައިހޫނުކަން ތަހައްމަލްކުރަމުންދާ އެކެއް ޕޮއިންޓް ދޭއް މިލިޔަން މީހުންނަށް އަވަސް ގޮތަކަށް ކާބޯތަކެއްޗާއި ބޭސް ފޯރުކޮށް ނުދެވިއްޖެނަމަ، ހައިހޫނުކަމުގައި އެތަށް ބަޔަކު މަރުވުން ފަދަ އިންސާނީ ކާރިސާއަކާ ކުރިމަތިލާން ޖެހިދާނެކަމަށެވެ.
ލުކޮކް ވިދާޅުވީ ދެކުނު ސޫދާންގެ ރައްޔިތުންގެ ތެރެއިން ތިންބައިކުޅަ ދެބައި މީހުން ވަނީ އިންސާނީ އެހީ އިންތިހާއަށް ބޭނުންވެފައި ކަމަށާއި އޭގެތެރެއިން ގިނަބަޔަކު ކާޑުބަލީގެ ޝިކާރައަކަށް ވެފައިވާކަމަށެވެ.
ދެކުނު ސޫދާންގެ ރައްޔިތުންގެ ތެރެއިން ދެ މިލިޔަނަށްވުރެ ގިނަމީހުން، ކާބޯތަކެތި ނުލިބިގެން އަވަށްޓެރި ޤައުމުތަކަށް ހިޖުރަކޮށްފައިވާ ކަމަށާއި ހަތްމިލިޔަން މީހުން ވަރަށް ދަތި ހާލުގައި ދެކުނު ސޫދާންގައި ދިރިއުޅެމުން ދާކަމަށްވެސް އިންސާނީ އެހީގެކަންތައްތަކާބެހޭ އދގެ ވަކީލު މާކް ލުކޮކް ވިދާޅުވިއެވެ.