އެމެރިކާގެ ރައީސް ޑޮނަލްޑް ޓްރަމްޕާ އިދިކޮޅު ފަރާތްތަކުން ޓްރަމްޕާއި ރަޝިޔާއާ ދެމެދު ގުޅުންތަކެއް އޮންނަ ކަމަށް ބުނެ އުފައްދަމުންދަނީ ހަޤީޤަތާ ޚިލާފު ވާހަކަތަކެއް ކަމަށާއި، އެ ވާހަކަތަކުގެ ސަބަބުން ޚުދު އެމެރިކާއަށް ގެއްލުން ލިބެމުންދާކަމަށް ރަޝިޔާގެ ރައީސް ވްލަޑްމީރް ޕުޓިން ވިދާޅުވެއްޖެއެވެ.
ރައީސް ޕުޓިން ކޮންމެ އަހަރަކުވެސް، އަހަރު ނިމުމުގެ ކުރިން ބާއްވަވާ ޚާއްޞަ ނޫސްވެރިންގެ ބައްދަލުވުމުގެ މި އަހަރުގެ ބައްދަލުވުމުގައި ވާހަކަދައްކަވަމުން ވިދާޅުވީ، ހުސްވި އަހަރު އެމެރިކާގައި ބޭއްވި އިންތިޚާބުގެ ކުރިން އެ ޤައުމުގެ މިހާރުގެ ރައީސް ޓްރަމްޕްގެ ކެމްޕެއިން ޓީމާ ރަޝިޔާގެ އޮފިޝަލުންނާ ދެމެދު އޮތީ ހަމަ އާދައިގެ ގުޅުމެއްކަމަށެވެ.
އަދި އެމެރިކާގެ ރައީސްކަމަށް ޓްރަމްޕް އިންތިޚާބުކުރި ފަރާތްތަކަށް އެމެރިކާގެ އިދިކޮޅު ފަރާތްތަކުން އިޙުތިރާމު ނުކުރާ ކަމަށްވެސް ޕޫޓިން ވިދާޅުވިއެވެ.
އެމެރިކާގެ ޖާސޫސީ އިދާރާތަކުން ބުނެފައިވަނީ ހުސްވި އަހަރު އެމެރިކާގައި ބޭއްވި ރިޔާސީ އިންތިޚާބުގައި ޓްރަމްޕަށް ކުރި ހޯދައިދިނުމަށް ރަޝިޔާއިން މަސައްކަތްކޮށްފައިވާ ކަމަށެވެ. އެހެންނަމަވެސް ޕުޓިން މިކަން ދޮގުކުރައްވައެވެ. ޕުޓިން ވިދާޅުވީ، މިއީ ޓްރަމްޕް ކުރައްވާފައިވާ މަސައްކަތްތަކުގެ އަގު ވައްޓާލުމަށް އިދިކޮޅު ފަރާތްތަކުން ދައްކާ ހަޤީޤަތާ ޚިލާފު ވާހަކަތަކެއްކަމަށެވެ.
ޕުޓިން ވިދާޅުވީ، ޓްރަމްޕްގެ ރިޔާސަތުގައި އެމެރިކާއިން ބޮޑެތި ކާމިޔާބީތައް ހާސިލުކޮށްފައިވާނަމަވެސް، ޓްރަމްޕްގެ ސަރުކާރު އަދި ވެސް އޮތީ ރަޝިޔާއާއެކު ގުޅުންތައް ބަދަހިކުރާނެ ފަދަ ހާލަތެއްގައި ނޫންކަމަށެވެ. އަދި ކުރިއަށް އޮތް ތަނުގައި މިކަން ބަދަލުވާނެކަމަށް އުއްމީދުކުރައްވާ ކަމަށާއި، ދެ ޤައުމުން ގުޅިގެން އެތައް ކުރިއެރުންތަކެއް ހާސިލުކުރެވޭނެކަމަށް ޕުޓިން ވިދާޅުވިއެވެ.