އީރާނުގައި ހިންގަމުންދާ ހަމަނުޖެހުންތަކުގައި މިހާތަނަށް މަރުވި މީހުންގެ ޢަދަދު 12 އަށް އަރައިފިއެވެ.
ހޯމަ ދުވަހު ހަމަދާންގައި ކުރި މުޒާހަރާތަކެއްގައި 6 މީހުން މަރުވެފައިވާ ކަމަށާއި އިސްފަހާންގައި ކުރި މުޒާހަރާތަކެއްގައި 3 މީހުން މަރުވެފައިވާކަމަށް، އީރާނުގެ ރަސްމީ ޓީވީން ވަނީ އިޢުލާންކޮށްފައެވެ. އަދި ފާއިތުވި ދެ ދުވަހު މަރުވި މީހުންނާއެކު މިހާތަނަށް 12 މީހުން މަރުވެފައިވާކަމަށް އީރާނުގެ ޓީވީން ޚަބަރުދެއެވެ.
މީގެ ތެރެއިން ގިނަ މީހުން މަރުވީ، ދަޢުލަތުގެ ބައެއް މުއައްސަސާތަކަށާއި އަމަނާބެހޭ ބައެއް މަރުކަޒުތަކަށް ހަމަލާދޭން މަސައްކަތްކުރުމުން އެކަން ހުއްޓުވުމަށްޓަކައި ފުލުހުން ބާރުގެ ބޭނުންކުރުމުގެ ސަބަބުން ކަމަށްވެސް އީރާނުން ބުނެއެވެ.
އީރާނުގެ ރައިސް ހަސަން ރޫހާނީ ވަނީ ސަރުކާރާ ދެކޮޅަށް ސުލްޙަވެރިކަމާއެކު އަޑުއުފުލުމުގެ ފުރުސަތު ރައްޔިތުންނަށް ދޭނެކަމަށާ ނަމަވެސް ގައުމުގައި ހަމަނުޖެހުން އުފެއްދުމުގެ ފުރުސަތު ނުދޭނެކަމަށް ވިދާޅުވެފައެވެ.
އީރާންގައި ކާބޯތަކެއްޗާއި ޚިދުމަތްތަކުގެ އަގު ބޮޑުވަމުންދާ މައްސަލާގައްޔާއި އެނޫންވެސް އިޤުތިޞާދީ މައްސަލަތަކާ ގުޅިގެން މިދިޔަ ބުރާސްފަތި ދުވަހުން ފެށިގެން ސަރުކާރާ ދެކޮޅަށް ރައްޔިތުން ކުރަމުންގެންދާ މުޒާހަރާތައް މިހާރުވަނީ ވަރަށް ބޮޑަށް ފުޅާވެފައެވެ.