2017 ވަނަ އަހަރު އެފްރިކާ ބައްރުން ވިލާތު ބައްރަށް ކަނޑުމަގުން ހިޖުރަކުރި ރެފިއުޖީންގެ ޢަދަދު 2016 ވަނަ އަހަރާ އަޅައިބަލާއިރު ދެބައިކުޅަ އެއް ބަޔަށް މަދުވެފައިވާކަމަށް ބައިނަލްއަޤުވާމީ ހިޖުރަކުރުމާ ބެހޭ ޖަމާޢަތުން ބުނެފިއެވެ.
އެ ޖަމާޢަތުން ބުނެފައިވަނީ 2017 ވަނަ އަހަރު އެފްރިކާ ބައްރުން މެޑިޓެރޭނިއަން ކަނޑު ހުރަސްކޮށް ވިލާތު ބައްރަށް ދަތުރުކޮށްފައިވާ ރެފިއުޖީންގެ އަދަދު ސަތޭކަ ހަތް ދިހަ އެއް ހާސް ހަ ސަތޭކަ ތިރީސް ފަހަކަށް އަރާކަމަށެވެ. އަދި މި ޢަދަދު 2016 ވަނަ އަހަރު އުޅުނީ ތިން ސަތޭކަ ފަސްދޮޅަސް ތިން ހާސް ފަސް ސަތޭކަ ހަތަރެއްގައި ކަމަށް ވެސް އެޖަމާޢަތުން ވަނީ ބުނެފައެވެ. މީގެ ދެ އަހަރު ކުރިން އެފްރިކާ ބައްރުން ވިލާތަށް ދިޔަ މީހުންގެ ޢަދަދު އެއް މިލިއަނަށް އެރިއެވެ.
ވޭތުވެދިޔަ އަހަރު އެފްރިކާ ބައްރުން އެންމެ ގިނަ ރެފިއުޖީން ހިޖުރަކޮށްފައިވަނީ އިޓަލީވިލާތަށް ކަމަށާއި މި މީހުންގެ ޢަދަދު ސަތޭކަ ނަވާރަ ހާސް ތިން ސަތޭކަ ދިހައަކަށް އަރާ ކަމަށްވެސް ބައިނަލްއަޤުވާމީ ހިޖުރަކުރުމާ ބެހޭ ޖަމާޢަތުން ވަނީ ބުނެފައެވެ. މިއީ ވޭތުވެދިޔަ ހަތަރު އަހަރުގެ ތެރޭގައި އިޓަލީވިލާތައް އެންމެ މަދުން ރެފިއުޖީން ހިޖުރަކުރި އަހަރު ކަމަށްވެސް އެ ޖަމާޢަތުން ވަނީ ބުނެފައެވެ.
2017 ވަނަ އަހަރު ވިލާތަށް ހިޖުރަކުރި ރެފިއުޖީންގެ ޢަދަދު މަދުވެފައިވަނީ، މިކަމަށްޓަކައި ވިލާތުގެ ޤައުމުތަކުން، ޙާއްސަކޮށް އިޓަލީވިލާތާއި ގްރީސް ފަދަ ގައުމުތަކުން، އަޅާފައިވާ ފިޔަވަޅުތަކުގެ ސަބަބުންކަމަށް ބައިނަލްއަޤުވާމީ ހިޖުރަކުރުމާ ބެހޭ ޖަމާޢަތުން ފާހަގަކުރެއެވެ.