ޣައްޒާގައި އިސްރާއީލުން ބާރުގެ ބޭނުންކުރަނީ މުނާސަބު މިންވަރަކަށްތޯ އީ.ޔޫ.އިން ސުވާލު އުފެއްދައިފި
ފަލަސްޠީނުގެ ޣައްޒާ އާއި އިސްރާއީލުން އިސްތިޢުމާރުކޮށްފައިވާ ފަލަސްތީނުގެ ބިންތައް ގުޅޭ ސަރަހައްދީ އިމުގައި ފަލަސްތީނުގެ ޢާއްމުން ކުރަމުންދާ މުޒާހަރާތައް ހުއްޓުވުމަށްކަމަށް ބުނެ، އިސްރާއީލުގެ އަސްކަރިއްޔާއިން ބާރުގެ ބޭނުންކުރަމުންދާ މިންވަރާމެދު ވިލާތުގެ އިއްތިހާދުން ސުވާލު އުފައްދައިފިއެވެ.
ފަލަސްޠީނުގެ ބިންތަކުން ބޭރުކޮށްލާފައިވާ ރެފިއުޖީންނަށް އެމީހުންގެ ވަޒަނަށް އެނބުރި ދިއުމުގެ ފުރުޞަތު ދިނުމަށް ގޮވާލާ ފަލަސްޠީނުގެ އެތައް ހާސް ބަޔަކު ކުރަމުންދާ މުޒާހަރާތަކުގެ ބައިވެރިންނަށް އަމާޒުކޮށް އިސްރާއީލުން ހުކުރު ދުވަހު ދިން ހަމަލާތަކުގައި އެކަނިވެސް ފަލަސްޠީނުގެ 10 މީހުން ޝަހީދުވިއެވެ. މީގެ ތެރޭގައި ނޫސްވެރިއަކާއި ކުޑަކުދިންވެސް ހިމެނެއެވެ.
މާރިޗު މަހުގެ 30 ވަނަ ދުވަހުއްސުރެ ކުރަމުންދާ މުޒާހަރާތަކުގައި މިހާތަނަށް، ފަލަސްތީނުގެ ޢާއްމުންގެ 31 މީހުން ވަނީ ޝަހީދުކޮށްލާފައެވެ.
ހުކުރު ދުވަހުގެ ހަމަނުޖެހުންތަކުގައި އިތުރު 491 މީހުން ޒަޚަމުކޮށްލާފައިވެއެވެ. އިސްރާއީލުން މުޒާހަރާގެ ބައިވެރިންނާ ދެކޮޅަށް ބާރުގެ ބޭނުންކޮށްފައިވާ މިންވަރާ މެދު ވިލާތުގެ އިއްތިހާދުން ނެރުނު ބަޔާނެއްގައި ބުނެފައިވަނީ، އިސްރާއީލުން ލައިވް ވަޒަން ބޭނުންކުރުމުގެ ސަބަބުން ޝަހީދުވި މީހުންގެ ތެރޭގައި 18 އަހަރު ނުފުރޭ ކުޑަކުއްޖަކާއި ނޫސްވެރިއަކު ހިމެނޭ ކަމަށާއި މިކަމަކީ އިސްރާއީލުގެ ސިފައިންގެ ޢަމަލުތަކާމެދު ސުވާލު އުފައްދަންޖެހޭ ފަދަ މައްސަލައެއް ކަމަށެވެ. އަދި މިކަމުގައި އިސްރާއީލު ޖަވާބުދާރީކުރުވަންޖެހޭ ކަމަށްވެސް ވިލާތުގެ އިއްތިހާދުން ބުނެއެވެ.