އޭނާ އާއި ބްރެޒިލްގެ ކުޅުންތެރިންގެ އުއްމީދުތައް ކުރިއަށް އޮތް ވޯލްޑް ކަޕާމެދު ވަރަށް މަތިކަމަށް ބްރެޒިލްގެ ފޯވަޑް ނޭމާ ބުނެފި އެވެ.
އަންނަ ބުރާސްފަތި ދުވަހު ރަޝިޔާގައި ފަށާ މުބާރާތަށް ތައްޔާރުވާން ކުޅުނު ފަހު މެޗުން ރޭ ބްރެޒިލް މޮޅުވީ ކުރިއަށް ކުޅޭ ތިން ކުޅުންތެރިން ކަމަށްވާ ނޭމާ އާއި ފިލިޕް ކުޓީނިއޯ އަދި ގްބަރިއަލް ޖެސޫސް ޖެހި ގޯލުތަކުން އޮސްޓްރިއާ އަތުން 3-0އިންނެވެ.
މި މެޗުގައި ނޭމާ ގޯލް ޖަހާފައިވާއިރު އޮސްޓްރިއާ ކުޅުންތެރިން ވަނީ ނޭމާ އަށް އަމާޒުކޮށް ވަރަށް ގިނަ، ނުރައްކާތެރި ޓެކްލްކޮށްފަ އެވެ. މެޗުގެ 84 ވަނަ މިނިޓްގައި އޭނާ ބަދަލު ކުރަން ޖެހުނީ ވެސް މި ސަބަބާހުރެ އެވެ.
"އަހަރުމެންގެ އުއްމީދުތައް ވަރަށް މަތިވެރި. އުއްމީދު ކުރަން. އަދި އަމިއްލަ ނަފްސަށް އިތުބާރު ވެސް ކުރަންވާނެ. ބްރެޒިލް މީހެއް ވިއްޔާ އުއްމީދުތަކަކާއެކު އަބަދުވެސް ހުންނާނީ،" މެޗަށް ފަހު ނޭމާ ބުންޏެވެ.
މުބާރާތް ކާމިޔާބު ކުރުން އެންމެ ގާތް އެއް ގައުމަކީ ވެސް ވޯލްޑް ކަޕް ފަސް ފަހަރު ކާމިޔާބުކޮށްފައިވާ ހަމައެކަނި ގައުމު ބްރެޒިލް އެވެ.
ކޯޗު ޓިޓޭ ރޭގެ މެޗަށް ފަހު ބުނީ އޭނާ ޓީމު ދެއްކި ކުޅުން ބަރާބަރު ކަމަށާއި ނޭމާ އާއި ކުރިއަށްކުޅޭ ޒުވާން ކުޅުންތެރިޔާ ޖެސޫސް އަދި ކުޓީނިއޯ ގޯލް ޖެހުމުގެ ހިތްހަމަޖެހުން އެބައޮތް ކަމަށެވެ.
"އަހަންނަކަށް ނޭނގެ މިހާރު ނޭމާގެ ކުރެވޭނެ އަދި ނުކުރެވޭނެ ކަންކަން ނިންމާނީ ކިހާ ހިސާބަކުން ކަމެއް. އެޓޭކިން ޑިޕާޓްމަންޓުގެ ކޮންމެ ހިސާބަކުން ފެނިގެންދަނީ އޭނާގެ މޮޅު ކަމާއި އުފެއްދުންތެރިކަން. އޭނާ ބަދަލުކުރީ ލިބިފައިވާ އަނިޔާ މުޅީން ރަނގަޅުނުވާއިރު އިދިކޮޅު ޓީމުން ކުރި ނުރައްކާތެރި ޓެކްލްތަކުގެ ސަބަބުން. އެކަމަކު މިއީ ފުޓްބޯޅަ. އެފަދަ ކަންކަމަށް އަހަރުމެން ތައްޔާރުވާންޖެހޭނެ،" ކޯޗު ބުންޏެވެ.