އިޓަލީގެ ޗެމްޕިއަން ޔުވެންޓަސްއަށް ސޮއިކުރީ ޗުއްޓީއަކަށްނޫން ކަމަށާއި، މުޅިން އާ ޗެލެންޖަކަށް ކަމަށް ޕޯޗުގަލްގެ ކެޕްޓަން ކްރިސްޓިއާނޯ ރޮނާލްޑޯ ބުނެފިއެވެ.
ޔޫރަޕުގެ ޗެމްޕިއަން ސްޕޭނުގެ ރެއާލް މެޑްރިޑު ދޫކޮށް، ފަސް ފަހަރުގެ ދުނިޔޭގެ މޮޅު ކުޅުންތެރިޔާ ރޮނާލްޑޯ ޔުވެންޓަސްއަށް ބަދަލުވީ 100 މިލިއަން ޔޫރޯ އަށެވެ. މިއީ އުމުރުން 33 އަހަރުގެ ކުޅުންތެރިއަކާ އަޅާބަލާއިރު ވަރަށް ބޮޑު އަގެކެވެ. އަދި މިއީ ރެއާލްއިން 2009 ވަނަ އަހަރު މެންޗެސްޓާ ޔުނައިޓެޑުގައި ހުއްޓައި ރޮނާލްޑޯ ގަތް އަގަށްވުރެ ވެސް ބޮޑު އަގެކެވެ.
"އަހަންނަކީ އެހެން ކުޅުންތެރިންނާ ތަފާތު މީހެއް. އަހަރެންގެ އުމުރުގެ ގިނަ ކުޅުންތެރިން 33 އަހަރުވީމަ މިދަނީ ގަތަރު ނޫނީ ޗައިނާ އަށް. އެކަމަކު އަހަރެން ތަފާތު. އަހަރެން ބޭނުންވަނީ އާ ޗެލެންޖްތަކެއް. ޔުވެންޓަސްގައި ޗެމްޕިއަންސް ލީގު ކާމިޔާބު ކުރަން އަހަރެން ބޭނުން،" ރޮނާލްޑޯ ބުންޏެވެ.
ރޮނާލްޑޯއަށް ޔުވެންޓަސްގެ ސަޕޯޓަރުން ވަނީ ވަރަށް ހޫނު މަރުހަބާއެއްކިޔައިފައެވެ. މިހެންވެ އޭނާ ބުނީ ސްޕޯޓަރުން މިފަދަ ހޫނު މަރުހަބާއެއް ކިއުމަކީ ކުލަބާއެކު ކުރިއަށް ދިއުމަށް ލިބޭ ވަރަށް ބޮޑު ހިތްވަރެއް ކަމަށެވެ.
"އަހަރެންނަކީ އެއްވެސް ކަމެއް ސާބިތުކޮށްދޭންޖެހޭ މީހެއްނޫން. އަހަރެން ފުޓްބޯޅައިގައި ކުރި ކަންތައްތައް އެހުރީ ހިސާބުތަކުން އެނގެން. އެކަމަކު އަހަރެން ބޭނުން އާ ހަރުފަތްތައް ގިނާކުރަން. ޔުވެންޓަސްގައި ވެސް އަހަރެންގެ ނަން ފަވާލަން ބޭނުން. ރެއާލް މެޑްރިޑާއި މެންޗެސްޓާ ޔުނައިޓެޑުގައި އަހަރެން މޮޅަށް ކުޅެފައި ހުއްޓަސް އެއީ އަހަރެން އަތްއުރާލައިގެން ހުންނަންޖެހޭ ކަމެއްނޫން. އަހަރެންގެ އުއްމީދުތަކާ ހަމައަށް ދާން އަހަރެން މަސައްކަތް ކުރަންޖެހޭނެ،" ރޮނާލްޑޯ ބުންޏެވެ.