ޗެމްޕިއަންސް ލީގު ފައިނަލް މެޗުގައި ކޮނޑަށް ލިބުނު އަނިޔާއިން މިހާރު މުޅިން ރަނގަޅު ވެފައިވާ ކަމަށް ލިވަޕޫލްގެ ފޯވަޑް މުހައްމަދު ސަލާހް ބުނެފިއެވެ.
މިސުރުގެ ފޯވަޑް މިހެން ބުނެފައިވަނީ ޗެމްޕިއަންސް ލީގުގެ ފައިނަލަށް ފަހު މުޅިން ފިޓްނުވި ނަމަވެސް ވަރލްޑް ކަޕުގައި ކުޅެފައިވާތީއާ އެކުއެވެ.
"މިހާރު ތަދެއް ނެތް. އަހަރެންނަށް ކުރިއަށްވުރެ ރަނގަޅުކަން އިހުސާސް ކުރެވޭ،" ސަލާހް ބުންޏެވެ.
އޭނާ ބުނީ ހުސްވި ސީޒަނަކީ ވަރަށް ކާމިޔާބު ސީޒަނެއް ކަމަށާއި، އެއަށްވުރެ ކާމިޔާބު ސީޒަނަށް މި ސީޒަން ހެދިދާނެ ކަމުގެ އުއްމީދު ބޮޑު ކަމަށެވެ.
"ޓީމަށް ވަނީ ކުރިއެރުން ލިބިފައި. އަހަރެން ވަރަށް ހިތްހަމަޖެހޭ ސްކޮޑާމެދު. ކުރިއަށްވުރެ ކާމިޔާބު ސީޒަނެއް އަހަރުމެންނަށް ހޯދިދާނެ. އަހަރެން މިހުރީ އާ ސީޒަނަށް ވަރަށް ބޮޑަށް ކެތްމަދުވެފައި. (ޓީމާ އަލަށް ގުޅުނު މީޑްފީލްޑަރު ނަބީ ކެއިތާ) އޭނާއާއެކު އަހަރެން ކުޅުނިން. އޭނާ ވަރަށް މޮޅު،" ސަލާހް ބުންޏެވެ.
ރޯމާއިން މިދިޔަ ސީޒަނުގައި ލިވަޕޫލާ ގުޅުނު ސަލާހް ވަނީ 32 ގޯލާއެކު މިދިޔަ ސީޒަނުގެ ޕްރެމިއާ ލީގުގެ ރަންބޫޓު ވެސް ހޯދާފައެވެ. އަދި އޭނާ އަކީ ފީފާއިން ހޮވާ ދުނިޔޭގެ މޮޅު ކުޅުންތެރިޔާގެ މަޤާމަށް ވާދަކުރާ ގަދަ 10ގައި ހިމެނިފައިވާ ކުޅުންތެރިއެކެވެ.