ޓީމަށް އާ ކުޅުންތެރިން ނުގެނެވިގެން މެންޗެސްޓާ ޔުނައިޓެޑުގެ ކޯޗު ހޯސޭ މޮރީނިއޯ ވަރަށް ބޮޑަށް މާޔޫސްވެއްޖެއެވެ.
އޭނާ ބުނީ ފަސް ކުޅުންތެރިއަކު ގެނައުމަށް އޭނާ މެނޭޖްމަންޓަށް ހުށަހަޅާފައިވާނެ ކަމަށާއި، އާ ސީޒަން ފަށަށް ދެ ހަފުތާއަށްވީއިރު އަނިޔާގެ މައްސަލަވެސް ވަރަށް ބޮޑު ކަމަށެވެ.
ކީޕަރު ސާޖިއޯ ރޮމޭރޯ އާއި އެންޓޯނިއޯ ވެލެންސިއާ އާއި ޑިއެގޯ ޑަލޮޓް އަދި ކްރިސް ސްމޯލިން އާއި ނެމަންޖާ މަޓިޗް އަދި ލޫކް ޝޯއަށް ވަނީ ހާނިއްކަވެފަ އެވެ. މޮރީނިއޯ ބުނީ އާ ސީޒަން ފަށަންވާއިރުމި ކުޅުންތެރިން ގަދަވެ ތިބޭނެ ކަމަށް ގަބޫލު ނުކުރެވޭ ކަމަށެވެ.
"ކީއްވެ އަހަރުމެންނަށް ކުޅުންތެރިން ނުގަނެވި ލަސްވެގެންމިދަނީ. އަހަންނަކަށް ނޭނގެ. އަހަރެންނަށް ކުޅުންތެރިން ނުލިބިއްޖިއްޔާ އެކަން ނިމުނީ. ލިބިއްޖެނަމަ ކިތަންމެހާ ވެސް ރަނގަޅު. ނުލިބިއްޖެނަމަ ތިބި ބަޔަކާއެކު އަހަރުމެން މަސައްކަތް ކުރާނަން،" ކޯޗު ބުންޏެވެ.
މިދިޔަ ސީޒަނުގައި މެންޗެސްޓާ ސިޓީއާ 15 ވަރަކަށް ޕޮއިންޓް ތަފާތުން ދެ ވަނާގައި ސީޒަން ނިންމާލި ޓީމަށް ކުޅުންތެރިން ނުގެނެވޭއިރު މޮރީނިއޯ ވަނީ ލިވަޕޫލް ފަދަ ޓީމުތަކުން ކުރާ ހަރަދާމެދު ކަންބޮޑުވުން ފާޅުކޮށްފައެވެ.
"ބައެއް ޓީމުތަކުން އެދަނީ ވަރަށް ބޮޑަށް އިންވެސްޓްކުރަމުން. އަހަރުމެން ޓީމު ގައިމު ވެސް ވަރުގަދަ ކުރަންޖެހޭ. އެކަމަކު އަދި އަހަރުމެން މިތިބީ އެކަން ނުކުރެވި،" ޗެލްސީގެ ކުރީގެ ކޯޗު ބުންޏެވެ.