ސާފް ޗެމްޕިއަންޝިޕަކީ އިންޑިޔާ އަށް ވަރަށް މުހިންމު މުބާރާތެއް ކަމަށް ޑިފެންޑަރު ސުބާސިޝް ބޯސް ބުނެފި އެވެ.
އަންނަ މަހު ބަނގްލަދޭޝްގައި ފަށާ މުބާރާތަށް ދިފާއީ ޗެމްޕިއަން އިންޑިޔާއިން ފޮނުވަނީ 23 އަހަރުން ދަށުގެ ޓީމެވެ. އެ ޓީމުގެ އެންމެ މުހިންމު އެއް ކުޅުންތެރިއަކީ ބޯސް އެވެ.
"އަހަރުމެންގެ ކޯޗު ދަނީ ޓީމު ވަރަށް ރަނގަޅަށް ތައްޔާރު ކުރަމުން ސާފް ޗެމްޕިއަންޝިޕަށް. ޕްރެކްޓިސްތައް ވަރަށް ބުރަ. އަހަރުމެން މިދަނީ 100 ޕަސެންޓް ދެމުން ޕްރެކްޓިހުގައި. ސާފް ކަޕަކީ އަހަރުމެންނަށް ވަރަށް މުހިންމު މުބާރާތެއް. އެއީ އަހަރުމެންނަށް އޮތް ޗެލެންޖެއް. އަހަރުމެން މޮޅުވާން ކުރެވެންހުރި ހުރިހާ ކަމެއް ކުރާނަން،" 22 އަހަރުގެ ޑިފެންޑަރު ބުންޏެވެ.
މުބާރާތުގައި އިންޑިޔާ ހިމެނެނީ ރާއްޖެ އާއި ލަންކާއާއެކު ގްރޫޕް ބީގަ އެވެ. އިންޑިޔާ އަކީ މުބާރާތުގެ އެންމެ ކާމިޔާބު ޓީމެވެ. އެ ގައުމުން ވަނީ މީގެ ކުރިން 23 އަހަރުން ދަށުގެ ޓީމު ފޮނުވައިގެން މުބާރާތް ކާމިޔާބުކޮށްފަ އެވެ.