އިޓަލީގެ ޤައުމީ ފުޓްބޯޅަ ޓީމަށް ކުޅުމާމެދު ވަކި ގޮތެއް ނުނިންމާ ކަމަށް ޔުވެންޓަސްގެ ކެޕްޓަން ޖިއޯޖިއޯ ކިއެލީނީ ބުނެފިއެވެ.
އޭނާ މިހެން ބުނީ ޤައުމީ ކޯޗު ރޮބާޓޯ މަންޗިނީ ކޯޗުކަމާ ހަވާލުވެ އެކުލަވާލި ފުރަތަމަ ސްކޮޑުން ޖާގަ ގެއްލިފައިވާތީއެވެ.
"ދެ ފަރާތަށް އެއްބަސްނުވެވޭ ކަންތައްތަކެއް އެބަހުރި. އަހަންނަކީ ވެސް ބޭނުންހާ ގޮތެއް ހެދިގެން ހުންނާނެ މީހެއްނޫން. މަޝްވަރާކުރެވެމުންދަނީ. އަހަރެން އަދި ވަކި ގޮތެއް ނުނިމަން ޤައުމީ ޓީމަށް ކުޅުމާމެދު،" ކިއެލީނީ ބުންޏެވެ.
އޭނާ ބުނީ ކޯޗުގެ ކޮންމެ ނިންމުމަކަށް އިހްތިރާމް ކުރާނެ ކަމަށެވެ.
"އަހަރެންގެ މައްސަލައެއްނެތް ކޯޗު ޒުވާން ކުޅުންތެރިންނަށް އިސްކަންދޭން ބޭނުންވާނަމަ އެކަން ކުރުމަކުން. އަހަރެންގެ މަޤާމަށް ކުޅޭނެ ވަރަށް ޒުވާން މޮޅު ކުޅުންތެރިން މިހާރު އެބަތިބި،" ކިއެލީނީ ބުންޏެވެ.
އޭނާ އަށް ޔުވެންޓަސްގެ ކެޕްޓަންކަން ލިބުނީ ހުސްވި ސީޒަނަށް ފަހު ކެޕްޓަން އަދި ގޯލްކީޕަރު ޖިއާން ލުއިޖީ ބުފަން ފްރާންސްގެ ޕީއެސްޖީއަށް ބަދަލުވުމުންނެވެ. ނަމަވެސް 17 އަހަރުގެ ދިގު ކެރިއަރުގައި ބުފަންއަށް ނުލިބުނު ޗެމްޕިއަންސް ލީގު އުފުލާލުމަށް ކިއެލީނީއަށް މި ސީޒަނުގައި ފުރުސަތު އެބައޮތެވެ. ސަބަބަކީ މި ސީޒަނުގައި މަޝްހޫރު ކްރިސްޓިއާނޯ ރޮނާލްޑޯވެސް ޓީމާ ގުޅިފައިވުމެވެ.
"އަހަރުމެން ރިސްކެއް ނުނަގާނަން. އަހަރުމެން ޓީމުގައި ޗެމްޕިއަންސް ލީގު ކާމިޔާބުކޮށްފައި ތިބި ކުޅުންތެރިން ތިއްބޭ ކިޔާފައި ފަސޭހަކޮށްފިނަމަ އެއީ ބަޔަކު ހަދާނެ އެންމެ ބޮޑު މިސްޓޭކް. އަހަރުމެން ޓީމަކީ އެކުގައި ގިނަ އަހަރުތަކެއް ވަންދެން ކުޅެފައިވާ ކުޅުންތެރިން ތިބި ޓީމެއް. މި ޓީމަށް (ރޮނާލްޑޯ) ކަހަލަ އާ ކުޅުންތެރިންގެ ހަކަތަ ލިބުމަކީ ވަރަށް ބޮޑު ކުރިއެރުމެއް،" ކިއެލީނީ ބުންޏެވެ.