އިނގިރޭސި ޕްރެމިއާ ލީގުގެ ފުރަތަމަ މެޗުގައި އާދީއްތަ ދުވަހު ވެސްޓްހޭމާ ދެކޮޅަށް ނުކުންނައިރު ޓީމުގެ ޑިފެންސް އޮތީ ވަރަށް ބޮޑަށް ބަލިކަށިވެފައި ކަމަށް ލިވަޕޫލުން ބުނެފިއެވެ.
ކޯޗު ޔާގެން ކްލޮޕް ބުނީ އޭނާގެ ޓީމުގެ ސެންޓްރަލް ޑިފެންޑަރުންގެ ތެރެއިން ފިޓްކޮށްތިބީ ވާޖިލް ވެންޑައިކާއި ޖޯ ގޮމޭޒް އެކަނި ކަމަށެވެ. އަނިޔާގެ ސަބަބުން ޖޮއެލް މަޓިޕާއި ރަގްނާ ކްލާވަންއަށް ޕްރީ ސީޒަނުގެ މުހިންމު މެޗުތައް ގެއްލިފައިވާއިރު، ކްރޮއޭޝިޔާގެ ޑިފެންޑަރު ޑެޖާން ލޮވްރެން އަދިވެސް ހުރީ ޗުއްޓީގައެވެ. އެއީ މިދިޔަ މަހު ރަޝިޔާގައި ނިމުނު ވަރލްޑް ކަޕް ފައިނަލް ކުޅެފައިވާތީ އޭނާގެ ޗުއްޓީ ދިގުލައިދިއުމުންނެވެ.
"މަޓިޕްއާ މެދު އަދި ވަކިއެއްޗެއް ބުނަން ދަތި. ކްލާވަންގެ އިންޖަރީ ސީރިއަސްއެއްނޫން. އެކަމަކު ޓީމު ކުޅެންޖެހޭ ފުރަތަމަ މެޗަށް މިއޮތް ދުވަސްކޮޅަށް ބަލާއިރު ފިޓްނަސް މައްސަލަ ވަރަށް ބޮޑު. ޑިފެންސް ލައިން މިއޮތީ ވަރަށް ބަލިކަށިކޮށް،" މިދިޔަ ސީޒަނުގެ ޗެމްޕިއަންސް ލީގު ފައިނަލް ކުޅުނު ޓީމުގެ ކޯޗު ބުންޏެވެ.
"އަހަރުމެން ފަހަރެއްގައި ފޯމޭޝަންގައި ޖާދޫއެއް ވެސް ހަދަންޖެހިދާނެ. މިހާރު ކަންތައްތައް މިއޮތް ގޮތުން. މި ލީގު ވަރަށް އުނދަގޫވާނެ. އަހަރުމެން ވާދަވެރި މެޗެއް ނުކުޅޭއިރު ޓީމު ޖަޖު ކުރަން އަދި ދަތިވާނެ،" ކްލޮޕް ބުންޏެވެ.
ކްލޮޕްގެ ޑިފެންސް ބަލިކަށި ނަމަވެސް އޭނާ ވަނީ މިދިޔަ 12 މަސްދުވަހުގެ ތެރޭގައި 250 މިލިއަން ޕައުންޑް ޚަރަދުކޮށް މޮޅު ކުޅުންތެރިންތަކެއް ގަނެފައެވެ. އޭގެ ތެރޭގައި ރެކޯޑް އަގަކަށް ގަތް ޑިފެންޑަރަކާއި، ކީޕަރެއް ވެސް އެބަހުއްޓެވެ. މިހެންވެ އެހެން ޓީމުތަކުގެ ކޯޗުންގެ ނަޒަރުގައި މިސީޒަނަކީ ލިވަޕޫލް ޕްރެމިއާ ލީގު ކާމިޔާބު ކުރަންޖެހޭ ސީޒަނެކެވެ.