ބާސެލޯނާގެ އާ ކެޕްޓަނަށް އާޖެންޓީނާގެ ގައުމީ ކެޕްޓަން ލަޔޮނަލް މެސީ ހަމަޖައްސައިފިއެވެ.
ކެޕްޓަން އަންދްރޭސް އިނިއެސްޓާ ކުލަބު ދޫކޮށްލުމުން މެސީގެ ދަށުން ވައިސް ކެޕްޓަނުންނަށް ހަމަޖައްސާފައިވަނީ ސާޖިއޯ ބުސްކެޓްސް އާއި ޖެރާޑް ޕީކޭ އާއި ސާޖިއޯ ރޮބާޓޯ އެވެ.
މީގެ ތެރެއިން މެސީއަކީ 1997ގެ ފަހުން ބާސެލޯނާގެ ކެޕްޓަންކަން ކުރި ފުރަތަމަ ބިދޭސީ ކުޅުންތެރިޔާއެވެ.
ބާސެލޯނާގެ އެކަޑަމީން ތެރެއިން ތައާރަފްވި މެސީ އަކީ ކުލަބަށް އެންމެ ގިނަ ގޯލު ޖަހައިދިން ކުޅުންތެރިޔާވެސްމެއެވެ. ބާސެލޯނާ ނޫން އެހެން ކުލަބަކަށް ކުޅެފައިވާ ނުވާ މެސީ ވަނީ ދުނިޔޭގެ މޮޅު ކުޅުންތެރިޔާގެ މަގާމު ފަސް ފަހަރު ހޯދައިފިއެވެ.
މީގެ އިތުރުން ބާސެލޯނާއިން ވަނީ ބްރެޒިލްގެ މިޑްފީލްޑަރު ފިލިޕް ކުޓީނިއޯ އަކީ ޔޫރަޕުގެ ކުޅުންތެރިއެއްގެ ގޮތުގައި ހަމަޖައްސައިފި އެވެ. އެއީ ޕޯޗުގަލްގެ ޕާސްޕޯޓެއް ހޯދައިދީގެންނެވެ.
މި ގޮތަށް ހަމަޖެއްސީ ބާސެލޯނާގައި ޔޫރަޕުން ބޭރުގެ ހަތަރު ކުޅުންތެރިން އަދަދު މާގިނަ ވުމުންނެވެ. ކުޓީނިއޯގެ ޕޯޗުގަލް ޕާސްޕޯޓެއް ލިބުނީ އޭނާގެ އަންހެނުންނަކީ އެ ޤައުމުގެ ރައްޔިތަކަށް ވާތީއެވެ.
މިއާއެކު ކުރިއަށް އޮތް ސުޕަ ކަޕުގައި ޔޫރަޕުން ބޭރުގެ ހުރިހާ ކުޅުންތެރިންނަށް ބާސެލޯނާ އަށް ކުޅެވޭނެ އެވެ.