އޭނާ ހީކުރި ވަރަށްވުރެ މާމޮޅަށް ލިވަޕޫލް ރޭ ވެސްޓްހޭމާ ދެކޮޅަށް ކުޅުނު ކަމަށް ކޯޗު ޔާގެން ކްލޮޕް ބުނެފިއެވެ.
ވެސްޓްހޭމް އަތުން 4-0 ން ލިވަޕޫލް މޮޅުވި އިރު މިއީ ޕްރެމިއާ ލީގު ފަށަން 1932 އަށް ފަހު އެ ޓީމުން ނެރުނު އެންމެ ތަފާތު ބޮޑު ނަތީޖާއެވެ.
ސާދިއޯ މާނޭ ދެ ގޯލު ޖެހިއިރު މެޗުގެ ފުރަތަމަ ލަނޑު ޖެހީ ހުސްވި ސީޒަނުގެ ޓޮޕް ސްކޯރަރ މުހައްމަދު ސަލާހެވެ. ފަހު ލަނޑު ޖެހީ ޑެނިއަލް ސްޓަރިޖެވެ.
"އަހަރެން އުއްމީދުކުރި ވަރަށް ވުރެ ޓީމު މާ ރަނގަޅު. އަހަރެން ހީކޮށްގެން ހުރީ މި މެޗުގައި އަހަރުމެން އެންމެ ބޭނުންވާ ކުޅުން ނުފެނިދާނެ ކަމަށް،" ކްލޮޕް ބުންޏެވެ.
އޭނާ ބުނީ މެންޗެސްޓާ ސިޓީގެ ކުރީގެ ކޯޗު މެނުއަލް ޕެލެގްރީނީގެ ކޯޗުކަމުގެ ދަށުން ކުޅޭ ވެސްޓްހޭމް ސީޒަނުގައި މޮޅަށް ކުޅޭނެ ކަމަށެވެ.
"އެއީ ހަމަ ޔަޤީންކަމެއް. އެމީހުން މޮޅަށް ކުޅޭނެ. އެކަމަކު އަހަރުމެން ވިސްނިން އެމީހުންނަކީ ޔުނައިޓެޑް ނޫނީ ސިޓީނޫން ކަމަށް. މެޗު ތަފާތު ވެގެންދިޔައީ މިފަދަ ސަބަބުތަކާހުރެ،" ކްލޮޕް ބުންޏެވެ.
މި މެޗުން މޮޅުވުމުން ގޯލުގެ ތަފާތުން ލިވަޕޫލް އޮތީ ޓޭބަލުގެ އެއްވަނާގަ އެވެ.