އޭނާގެ ސްޓައިލަށް ފެތެން އާސެނަލް އަށް ވަގުތު ބޭނުންވާ ކަމަށް ޓީމާ އަލަށް ހަވާލުވި ކޯޗު އުނާއީ އެމެރޭ ބުނެފިއެވެ.
22 އަހަރަށް ކޯޗުކަމުން އާސެން ވެންގާ ވަކިވުމުން ޓީމާ ހަވާލުވި އެމެރޭ މިހެން ބުނީ އޭނާގެ ކޯޗުކަމުގައި ކުޅުނު ފުރަތަމަ މެޗުގައި ރޭ ޕްރެމިއާ ލީގުގެ ޗެމްޕިއަން މެންޗެސްޓާ ސިޓީ އަތުން 2-0 ން ބަލިވުމުންނެވެ.
"އަހަރެން ހިތްހަމަޖެހޭ ކުޅުމާމެދު. ކުޅުންތެރިން ވަރަށް މަސައްކަތްކުރި. ވަރުބަލިވުމެއްނެތި ދުވެ، ވަރަށް ފޯރީގައި ކުޅުނު. އަހަރުމެންނަށް އަދި ވަގުތުބޭނުންވޭ ޓީމު އެކުލަވާލަން،" އެމެރޭ ބުންޏެވެ.
"އަހަރެންގެ ސްޓައިލަށް ކުޅެން ޓީމު އަދި މުޅީން ތައްޔާރެއްނޫން. އެކަމަށް ތައްޔާރުވަމުން ދަނީ. މިއީ އޭގެ ފުރަތަމަ ފިޔަވަޅު. ގާޑިއޯލާއާއެކު މެންޗެސްޓާ ސިޓީ ކުޅޭ މިއީ ތިން ވަނަ އަހަރު. އެހެންވީމަ އެ ތަފާތު ފެނިގެންދިޔަ،" އެމެރޭ ބުންޏެވެ.