އޭނާ ދައްކަންހުރި ވާހަކަތައް ދައްކައިފިނަމަ ޖޫރިމަނާ ކުރާނެ ކަމަށް މެންޗެސްޓާ ޔުނައިޓެޑުގެ މިޑްފީލްޑަރު ޕައުލް ޕޮގްބާ ބުނެފިއެވެ.
ޔުނައިޓެޑުގެ އެންމެ އަގުބޮޑު ކުޅުންތެރިޔާ މިހެން ބުނީ މި ސީޒަން ފެށުމުގެ ކުރިން ސްޕޭން ބާސެލޯނާއަށް ބަދަލުވާނެ ކަމަށް އަޑުފެތުރިފައިވާ ވަގުތެއްގައެވެ.
"އުފަލުގައި ނެތި މޮޅަށް ނުކުޅެވޭނެ. މޮޅަށް ކުޅެވޭނީ އޭނާ ހިތްހަމަޖެހިގެން ހުރިނަމަ. އަހަރެން ދައްކަންޖެހޭ ބައެއް ވާހަކަ ދެއްކޭކަށްނެތް. އަހަރެންގެ އަސްލު އިހުސާސްތައް ބުނެދެވޭކަށްނެތް. ބައެއް ވާހަކަތައް ދައްކައިފިނަމަ އަހަރެން ޖޫރިމަނާ ކުރާނެ،" ޕޮގްބާ ބުންޏެވެ.
ފްރާންސަށް ވަރލްޑް ކަޕް ކާމިޔާބުކޮށްދިން ޕޮގްބާ އަކީ ޔުނައިޓެޑުގެ ކޯޗު ހޯސޭ މޮރީނިއޯ ގަޔާވާ ކުޅުންތެރިއެކެވެ. ނަމަވެސް ޕޮގްބާ އަދިވެސް މޮޅަށް ކުޅެންޖެހޭ ކަމަށް މޮރީނިއޯ ދަނީ ތަކުރާރުކޮށް ބުނަމުންނެވެ. ޤައުމީ ޓީމާއި ކުލަބުގައި ދައްކާ ކުޅުން ތަފާތު ކަމަށް ދެކެވޭ ވާހަކައިގައިވެސް ޕޮގްބާ ވަނީ ވާހަކަ ދައްކާފަ އެވެ.
"އަހަރެން ވަކި ތަފާތެއްނުވޭ. އެކަމަކު މިއީ ދެ ޓީމެއް. (ގައުމީ ޓީމާއި ޔުނައިޓެޑް). އަހަރެން ބޭނުންހާ ގޮތަކަށް ވެސް ނުކުޅެވޭނެ،" ޕޮގްބާ ބުންޏެވެ.
މޮރީނިއޯ ވަނީ ޕޮގްބާ އަކީ ކިހާ މޮޅު ކުޅުންތެރިއެއްކަން އަމިއްލައަށް ވިސްނައިގެން ކުޅެން ޕޮގްބާއަށް ގޮވާލައިފައެވެ.
ނަމަވެސް ޕޮގްބާގެ ކުރިމަގާ މެދު ތަފާތު ގޮތްގޮތަށް ވާހަކަ ދެކެވެމުންދާއިރު ޕްރެމިއާ ލީގު ހުޅުވަން ހުކުރު ދުވަހުގެ ރޭ ލެސްޓާ ސިޓީއާ ދެކޮޅަށް އޭނާ ނުކުތީ ކެޕްޓަން ބޭންޑާ ވެސް އެކުގައެވެ.