ޔޫއޭފާ ސުޕަކަޕްގައި ބުދަ ދުވަހުގެ ރޭ އެތްލެޓިކޯ މެޑްރިޑާ ދެކޮޅަށް ކުޅޭ ރެއާލް މެޑްރިޑުގެ ޓީމުގައި މިޑްފީލްޑަރު ލޫކާ މޮޑްރިޗް ހިމަނައިފިއެވެ.
ނިމިދިޔަ ވަރލްޑް ކަޕުގެ މޮޅު ކުޅުންތެރިޔާ ސްކޮޑުގައި ހިމަނާފައިމިވަނީ އޭނާ ގަތުމަށް އިޓަލީގެ އިންޓަމިލާނުން ކުރާ މަސައްކަތާއެކު ކުޅުންތެރިޔާގެ ކުރިމަގު ނޭނގުމެއްގެ ތެރޭގައި ވަނިކޮށެވެ. ނަމަވެސް މިއީ ކޮންޓްރެކްޓްގައި ބާކީ ދެ އަހަރު އޮތް ކުޅުންތެރިޔާ އިންޓައަށް ވިއްކާނުލާނެ ކަމުގެ އިޝާރާތެކެވެ. ރެއާލްއިން މިހާރު ދަނީ އުމުރުން 33 އަހަރުގެ މޮޑްރިޗުގެ ކޮންޓްރެކްޓް އާކުރުމަށް ވެސް މަސައްކަތް ކުރަމުންނެވެ.
ނަމަވެސް މޮޑްރިޗުގެ އެޖެންޓް ވަނީ ކޮންމެވެސް ދުވަހަކުން އިޓާލިއަން ލީގުގައި ކުޅެ ތަރިއަކަށްވުމަށް ކުޅުންތެރިޔާ ބޭނުންވާ ކަމަށްބުނެފައެވެ.
ކޯޗު ހޫލެން ލެޕޮޓީގުއި އެކުލަވާލި ސްކޮޑުން ޓީމާ އަލަށް ކުޅުނު ބެލްޖިއަމްގެ ކީޕަރު ތިބައޫ ކޯޓު އާއި ބްރެޒިލްގެ ޒުވާން ފޯވަޑް ވިނިސިއަސް ޖޫނިއާއަށް ވެސް ޖާގަ ދީފައިވެ އެވެ. ނަމަވެސް ނޯވޭގެ ކުޅުންތެރިޔާ މާޓިން އޮޑެގާޑަށް ފުރުސަތު ދީފައިނުވެއެވެ. ލޯނު އުސޫލުން އޭނާ ދޫކޮށްލުމަށް ނިންމާފައިވާއިރު ކުރީގެ ކާމިޔާބު ކޯޗު ޒައިނުއްދީން ޒިދާންގެ ދަރިފުޅު އަދި ކީޕަރު ލޫކާ ޒިދާން ވެސް ލޯނު އުސޫލުން ދޫކޮށްލަން ދަނީ ތައްޔާރުވަމުންނެވެ.