ޗެލްސީގެ ކުރީގެ ކޯޗު އެންޓޯނިއޯ ކޮންޓޭ ބާކީކޮށްފައި ބެހެއްޓި ޑިފެންޑަރު ޑޭވިޑް ލުއިޒްއަށް އެކުލަބުގައި ކުރިމަގު އެބައޮތް ކަމަށް އާކޯޗު މައުރީޒިއޯ ސަރީ ބުނެފިއެވެ.
އޭނާ މިހެން ބުނީ ޕްރެމިއާ ލީގުގެ ފުރަތަމަ މެޗުގައި ހަޑާސްފީލްޑް ޓައުނާ ދެކޮޅަށް ލުއިޒް ލައްވައި ކުޅުވުމަށްފަހުއެވެ.
"އަހަރެން އޭނާއާ އެކު ކުރި މަސައްކަތަށް ބަލާއިފައި ބުނަންޖެހެނީ އޭނާއަށް މި ކުލަބުގައި ފުރުސަތު އެބައޮތޭ. އަހަރެން ވަރަށް ހިތްހަމަޖެހޭ އޭނާގެ ކޮމިޓްމަންޓާއި މަސައްކަތާމެދު،" ބްރެޒިލްގެ ޑިފެންޑަރާ ބެހޭ ގޮތުން ސަރީ ބުންޏެވެ.
ކޮންޓޭ އޭނާ ބާކީ ކުރުމުގެ ސަބަބުން ލުއިޒްއަށް ވަނީ ނިމިދިޔަ ވަރލްޑް ކަޕަށް ދިޔަ ބްރެޒިލް ޓީމުން ވެސް ޖާގަ ގެއްލުނެވެ. ޗެލްސީގެ ގިނަ ކުޅުންތެރިން ތިބީ މިދިޔަ ސީޒަން ނިމުނުއިރު ކޮންޓޭއާ މައްސަލަޖެހިފައެވެ. ބްރެޒިލްގެ ވިލިއަން ބުނީ ކޯޗަކަށް ކޮންޓޭހުރިނަމަ އޭނާ ޗެލްސީ ދޫކޮށްލާނެ ކަމަށެވެ.