ވަރަށް ބޮޑަށް ފޯމު ކަޓާފައި ހުއްޓައި ސްޕެނިޝް ކަޕުގައި ސެވިއްޔާ ކޮޅަށް ބާސެލޯނާގެ ފިލިޕް ކުޓީނިއޯ ޖެހި ދެ ލަނޑާއެކު އޭނާ އަށް ނަސީބު އެހީވި ގޮތާމެދު ކުޓީނިއޯ އާއި ކެޕްޓަން ލަޔޮނަލް މެސީ ވާހަކަ ދައްކައިފި. ކުޅުން ގޯސްވުމުގެ ސަބަބުން ކުޓީނިއޯ އަށް މީޑިޔާތަކުގެ ފާޑުކިއުން ވަރަށް ބޮޑަށް އަމާޒުވެފައިވަނިކޮށް އެ މެޗުގައި އޭނާ މޮޅަށް ކުޅުނު. ފުރަތަމަ ލަނޑު ޖެހީ ޕެނަލްޓީއަކުން. ދެ ވަނަ ލަނޑަކީ ބާސެލޯނާ އަށް އެގްރިގޭޓުން ކުރި ލިބުނު މުހިންމު ލަނޑު.
މެޗަށް ފަހު ވާހަކަ ދައްކަމުން ކުޓީނިއޯ ބުނީ މެޗަށް އޭނާ ނުކުތީ އަތުގައި ރަތްރިބަން އަޅައިގެން ކަމަށާއި، އެއީ މެސީ ދިން ރިބަންފަށެއް ކަމަށް. އަދި ބާސެލޯނާގައި އާއްމުކޮށް ޕެނަލްޓީ ޖަހަނީ މެސީ ނަމަވެސް ސެވިއްޔާ މެޗުގައި ލިބުނު ޕެނަލްޓީ ޖަހަން މެސީ އޭނާ އަށް ފުރުސަތު ދިނުމުން ޝުކުރު އަދާކުރާ ކަމަށް.
މެސީ ބުނީ ކުޓީނިއޯ އަޅަން އޭނާ ދިން ރަތް ރިބަން ފަށަކީ މިދިޔަ އަހަރުގެ ވޯލްޑް ކަޕުގައި މީހަކު އޭނާ އަޅަން ދިން ރަތް ރިބަން ފަށެއް ކަމަށް. އަދި އެއީ ނަސީބު ގަދަކޮށްދޭ އެއްޗެއް ކަމަށް ރިބަންފަށްދިން މީހާ ބުނެފައިވާ ކަމަށް. ލިވަޕޫލުން މިދިޔަ ސީޒަނުގައި 147 މިލިއަން ޕައުންޑަށް ކުޓީނިއޯ ބާސެލޯނާ އަށް ބަދަލުވީ އެކުލަބުގެ ތާރީހުގައި އެންމެ އަގުބޮޑު ކުޅުންތެރިޔާގެ ގޮތުގައި. އޭނާގެ ދިފާއުގައި މެސީގެ އިތުރުން ފޯވަޑް ލުއިސް ސުއަރޭޒް ވެސް ވަނީ ވާހަކަ ދައްކައިފައި. ކުޓީނިއޯ އާއެކު ލިވަޕޫލްގައި ވެސް ކުޅުނު ސުއަރޭޒް ބުނީ ކުޓީނިއޯ އަށް މިދިޔަ ދުވަސްތަކުގައި އެދެވޭ ކުޅުމެއް ނުދެއްކުނީ ފަލަމަސްގަނޑަށް ލިބުނު އަނިޔާގެ ސަބަބުން ކަމަށް. އަދި ކުރިއަށް އޮތްތަކުގައި އޭނާ މޮޅަށް ކުޅޭނެ ކަމުގެ ޔަގީންކަން އެބައޮތް ކަމަށް.