ކެޕްޓަން ލަޔޮނަލް މެސީގެ ކޮންޓްރެކްޓް އާކުރާނީ ކުޅުންތެރިޔާ އެކަމަށް ބޭނުންވުމުން ކަމަށް ބާސެލޯނާއިން ބުނެފިއެވެ.
ބާސެލޯނާގެ ރައީސް ޖޯސެޕް ބާޓޮމެއު މިހެން ބުނީ މެސީގެ ކޮންޓްރެކްޓް 2021ގައި ހަމަވާތީވެ އެކަމާބެހޭ ގޮތުން ނޫސްވެރިން ސުވާލުކުރުމުންނެވެ.
ބާޓޮމެއު ބުނީ މެސީގެ ކޮންޓްރެކްޓްގައި ބާކީ އަދި ދެ އަހަރު އެބައޮތްކަމަށް އެހެންކަމުން އޭނާ ކޮންޓްރެކްޓް އާކުރަން ބޭނުންވެއްޖެނަމަ އެކަން ކުރާނެ ކަމަށާއި، އެހެންނޫނީ މިވަގުތު އެކަމާ ވިސްނުމެއްނެތް ކަމަށެވެ. އަދި މެސީ މިހާރު ކުޅޭ ކުޅުމަށް ބަލާއިރު އޭނާ ކިތަންމެ ދިގު މުއްދަތަކަށް ވެސް ކުލަބުގައި ބެހެއްޓިދާނެކަމަވެސް އެނާ ބުންޏެވެ.
އުމުރުން މިހާރު 31 އަހަރުގެ މެސީ ގެންދިއުމަކީ އެހެން ކުލަބަކަށް ފަސޭހަ ކަމަކަށްނުވާނެއެވެ. ނަމަވެސް އޭނާ ގެންދިއުމަށް އަރަބި މަހުޖަނުން ހިންގާ ދެ ކުލަބު ކަމަށްވާ އިނގިރޭސިވިލާތުގެ މެންޗެސްޓާ ސިޓީ އާއި ފްރާންސްގެ ޕީއެސްޖީ ޝައުގުވެރިވެއެވެ.
ބާޓޮމެއު ބުނީ ބާސެލޯނާގެ ކްރޮއޭޝިޔާ މިޑްފީލްޑަރު އިވާން ރަކިޓީކްގެ ކޮންޓްރެކްޓް އާކުރާނީ މާލީ ގޮތުން އެކަން ކުރަން އެންމެ ރަނގަޅު ވަގުތު ޖެހުމުން ކަމަށެވެ. އޭނާ މިހެން ބުނީ މިހާރަށްވުރެ ބޮޑު މުސާރައަކަށް ރަކިޓިކް ޑިމާންޓްކުރާނެ ކަމަށް ނޫސްތަކުން ބުނަން ފެށުމުންނެވެ.
ބާޓޮމެއު ބުނީ ޖޯޑީ އަލްބާގެ ކޮންޓްރެކްޓް ވަރަށް އަވަހަށް އާކުރާނެ ކަމަށެވެ.
ބާސެލޯނާއިން ދަނީ އަންނަ ސީޒަނަށް ޓީމު ވަރުގަދަ ކުރުމުގެ މަސައްކަތް ވެސް ކުރަމުންނެވެ. މި ގޮތުން މިހާރު ސޮއިކުރުވާފައިވަނީ އަޔެކްސް އަށް ކުޅޭ ނެދަލޭންޑްސްގެ އުއްމީދީ މިޑްފީލްޑަރު ފްރޭންކް ޑިޔޮންގްއެވެ. އޭނާގެ އިތުރުން އަޔެކްސްއަށް ކުޅޭ ޑިފެންޑަރު ޑިލައިޓް ގަތުމަށް ވެސް ބާސެލޯނާގެ ދަނީ މަސައްކަތް ކުރަމުންނެވެ. އަދި ޖަރުމަނުގެ ފޯވަޑް ޓިމޯ ވާނާ އަކީ ވެސް ބާސެލޯނާއިން ބޭނުންވާ ކުޅުންތެރިއެކެވެ.