މައުރޯ އިކާޑީ އަތުން އިންޓަމިލާނުގެ ކެޕްޓަންކަން އަތުލައިފި އެވެ.
އިންޓަގެ ކެޕްޓަކަން މިވަގުތު ހަވާލުކޮށްފައިވަނީ ކީޕަރު ސާމިރު ހެންޑޮނޮވިކާ އެވެ.
މިކަން މިގޮތަށް ކުރީ ރެޕިޑް ވިއޭނާއާ ދެކޮޅަށް ކުޅޭ މެޗަށް ޓީމާއެކު ދާން އޭނާ ދެކޮޅު ހެދުމުންނެވެ. އުމުރުން 25 އަހަރުގެ އިކާޑީ އަކީ ރެއާލް މެޑްރިޑާއި މެންޗެސްޓާ ޔުނައިޓެޑުން ބޭނުންވެގެން އުޅޭ ފޯވަޑެކެވެ. އޭނާ ދާދި ފަހުން ވަނީ ޓީމުގައި އެކުގައި ކުޅޭ ކުޅުންތެރިންގެ ފަރާތުން އެކަށީގެންވާ އެހީތެރިކަން ނުލިބޭ ކަމަށްބުނެ ޝަކުވާ ކޮށްފަ އެވެ. އިކާޑީ ލީގުގައި އެންމެ ފަހު ގޯލެއް ޖެހީ މިދިޔަ ޑިސެމްބަރު މަހު އެވެ.
ކޯޗު ލޫސިއާނޯ ސްޕެލެއްޗީ ބުނީ އިކާޑީ އަތުން ކެޕްޓަކަން އަތުލުމަކީ ފަސޭހަ ނިންމުމެއްނޫން ކަމަށެވެ. ނަމަވެސް އެކަން ކުރީ ކުޅުންތެރިޔާގެ އަމަލުތައް ހުރި ގޮތުން އެހެން ކުޅުންތެރިންނަށް އެކަމުގެ ނޭދެވޭ އަސަރު ކުރުވުން ހުއްޓުވުމަށާއި ކުލަބުގެ އަސާސްތައް ދަމަހައްޓަން ކަމަށެވެ.
2013 ވަނަ އަހަރު އިންޓައާ ގުޅުނު އިކާޑީ އެންމެ ފަހުން އާކުރު ކޮންޓްރެކްޓާއެކު އޭނާގެ ކޮންޓްރެކްޓް ހަމަވާނީ 2021 ވަނަ އަހަރު އެވެ.