ބުދަ ދުވަހު ޗެމްޕިއަންސް ލީގުގައި ކުޅޭ މެޗަށް ބާސެލޯނާގެ މުހިންމު ކުޅުންތެރިން ރެސްޓް ކުރުވަން ނިންމައިފިއެވެ.
މިހެންވެ ސްޕެނިޝް ލީގުގައި މިރޭ ޓޭބަލުގެ ފުލުގައި އޮތް ހުއެސްކާއާ ދެކޮޅަށް ކުޅޭ މެޗަށް ކެޕްޓަން ލަޔޮނަލް މެސީ ލައްވައި ނުކުޅުވާނެއެވެ. މީގެ އިތުރުން ވައިސް ކެޕްޓަން ސާޖިއޯ ބުސްކެޓްސް މި މެޗުގައި ނުކުޅޭނެއެވެ. އަދި ފުރަތަމަ 11އިން ފިލިޕް ކުޓީނިއޯ ވެސް ނުފެންނާނެއެވެ.
މިރޭގެ މެޗަށް ލުއިސް ސުއަރޭޒް ހުރީ ސަސްޕެންޑްކޮށްފައެވެ. އެއީ ކާޑު ހަމަވުމުގެ ސަބަބުންނެވެ.
މިހެންވެ ފުރަތަމަ 11ގައި މިރޭ އެންމެ އިސް ފޯވަޑެއްގެ ގޮތުގައި ކުޅޭނީ ޕްރިންސް ބޯޓެން އާއި އޮސްމާނޭ ޑެމްބެލޭއެވެ.
ކޯޗު އާނެސްޓޯ ވަލްވާޑޭ ބުނީ ސްޕެނިޝް ލީގުގައި 11 ޕޮއިންޓްގެ ލީޑަކާއެކު އޮތުމުން މިވަގުތު މުހިންމު މެންޗެސްޓާ ޔުނައިޓެޑާ ދެކޮޅަށް ޗެމްޕިއަންސް ލީގުގައި ކުޅެން ޖެހޭ މެޗު ކަމަށެވެ.
މި ދެ ޓީމު ޔުނައިޓެޑްގެ ދަނޑުގައި ކުޅުނުމެޗްގައި 1-0އިން ބާސެލޯނާ މޮޅުވިއެވެ. ނަމަވެސް ޔުނައިޓެޑުން ވަނީ ބާސެލޯނާގެ ދަނޑުގައި އެ ޓީމު ބަލިކުރެވޭނެ ކަމަށް ބުނެފައެވެ. ބާސެލޯނާއިން މެޗު ސީރިއަސްކޮށް ނަގަނީ ދެ ކަމަކާހުރެއެވެ. އެއީ ބޮޑު ލީޑެއް ލިބިފައި އޮއްވައި މިދިޔަ އަހަރު ކުއާޓާ ފައިނަލްގެ ފަހު މެޗުގައި ފަރުވާ ކުޑަކޮށްލުމުން ބަލިވެ މުބާރާތުން ކަޓާފައިވުމާއި މި ސީޒަނުގައި ޔުނައިޓެޑުން ގަދަފަދަ ޕީއެސްޖީ ބަލިކޮށްފައިވުމުންނެވެ.