ދެ މެޗުގެ އެގްރީގޭޓުން ޓޮޓެންހަމް އަތުން މޮޅުނުވެވި ޗެމްޕިއަންސް ލީގުން ކެޓުމަކީ ހިތްދަތި ކަމެއް ނަމަވެސް ތިން ތައްޓަށް އަމާޒުހިފާނެ ކަމަށް ކޯޗު ޕެޕް ގާޑިއޯލާ ބުނެފި އެވެ.
އޭނާ މިހެން ބުނިއިރު ޓޮޓެންހަމަކީ ޕްރެމިއާ ލީގު ތަށި ހޯދަން ސިޓީ ކުޅެން ޖެހޭ ފަހު ފަސް މެޗުގެ ތެރެއިން ކުރިމަތިލާންޖެހޭ އެންމެ ވަރުގަދަ ޓީމެވެ. މި މެޗު ކުޅޭނީ އަންނަ ހޮނިހިރު ދުވަހުއެވެ.
"އަހަރުމެންނަށް މިއީ ވަރަށް ހިތްދަތި ވަގުތެއް. އެކަމަކު އެމީހަކަށް ނިދޭނެ އެންމެ ބޮޑަކަށް ނިދާފައި އަހަރުމެން އަނެއް މެޗަށް ތައްޔާރުވާންޖެހޭ. ހަތަރު މުބާރާތުގެ ތެރެއިން ދެން އަމާޒަކީ ތިން ތަށި ހޯދުން" ގާޑިއޯލާ ބުންޏެވެ.
ސިޓީގެ އަމިއްލަ ދަނޑުގައި އެ ޓީމު ރޭ މޮޅުވީ 4-3އިންނެވެ. ނަމަވެސް ޓޮޓެންހަމުގެ ދަނޑުގައި ކުޅުނު މެޗު 1-0އިންނެވެ. އެ ޓީމު ކާމިޔާބުކޮށްފައިވާތީވެ ޗެމްޕިއަންސް ލީގު ސެމީ އަށް ޓޮޓެމްހަމް ދިޔައީ އަވޭ ގޯލުގެ ތަފާތުންނެވެ. މި ދެ މެޗުން ކުރި ހޯދުމަށް ރޭ ގެ މެޗުގެ އިތުރު ވަގުތުގައި ރަހީމް ސްޓާލިން ގޯލެއް ވެސް ޖެހި އެވެ. ނަމަވެސް ވީއޭއާރުގެ ޒަރީއާއިން ރީޕްލޭ ބެލުމަށްފަހު ރެފްރީން ނިންމީ އެއީ ގޯލެއްނޫން ކަމަށެވެ.
ރޭގެ މެޗު ފުރަތަމަ 12 މިނިޓް ތެރޭގައި ކޮންމެ ޓީމަކުން ދެ ގޯލު ޖެހި އެވެ. ރަހީމް ސްޓާލިންގެ ގޯލަށް ފަހު ޓޮޓެންހަމުން ލީޑް ނެގީ ސަން ޖެހި ދެ ގޯލުންނެވެ. އޭގެ ފަހުން ސިޓީން އެއްވަރުކުރީ 12 ވަނަ މިނިޓްގައި ބެނާޑޯ ސިލްވާ ޖެހި ގޯލުންނެވެ. އަދި ފަހު ހާފުގައި ސާޖިއޯ އަގުއެރޯ އާއި ސްޓާލިންގެ ގޯލުން ސިޓީ ކުރި ހޯދި ނަމަވެސް ސެމީ އަށް ދިއުމުގެ އުއްމީދުތައް ވިއްސިވިހާލިވީ ލޮރަންޓޭ ޖެހި ގޯލުންނެވެ.