އެއްވެސް ޓާގެޓެއްނެތި ޓޮޓެންހަމުގައި ހުންނަން ބޭނުންނުވާ ކަމަށް މައުރީސިއޯ ޕޮޗެޓިނޯ ބުނެފިއެވެ.
ޗެމްޕިއަންސް ލީގު ފައިނަލަށް ޓީމު ގެންގޮސްދިނުމަށްފަހު އޭނާ ވަނީ ތަށި ލިބިއްޖެނަމަ ޓީމު ދޫކޮށްލުން ވަރަށް ގާތްކަމަށް ބުނެފައެވެ. ޕޮޗެޓީނޯ ހޯދުމަށް އެންމެ ބޮޑަށް މަސައްކަތް ކުރަނީ އިޓަލީގެ ޔުވެންޓަސްއެވެ. އެކުލަބުން ބުނީ އަހަރަކު 20 މިލިއަން ޔޫރޯގެ މުސާރައަކަށް ޕޮޗެޓީނޯ ޑިމާންޑް ކުރާ ކަމަށެވެ. އަދި ޔުވެންޓަސްގެ މިހާރުގެ ކޯޗު މަސިމޯ އަލެގްރީ ކުރިމަގާމެދު ވަކިގޮތެއް ނުނިންމާކަމަށްވެސް އިޓަލީގެ ނޫސްތަކުން ބުނެއެވެ.
ޕޮޗެޓީނޯ ބުނީ ޓޮޓެންހަމުގައި ޓާގެޓެއް އޮންނަން ޖެހޭ ކަމަށެވެ. އޭނާ ބުނީ ފަސް އަހަރު ކުރިން އޭނާ ޓީމާ ހަވާލުވިއިރު ޓޮޓެންހަމް ބޭނުންވީ ގަދަ ހަތަރެއްގައި އޮވެ، ޗެމްޕިއަންސް ލީގަށް ކޮލިފައިވާން ކަމަށެވެ. އަދި މިހާރު އެކަން ފުރިހަމަވެއްޖެ ކަމަށާއި އިތުރު ޓާގެޓްތަކެއް އެކުލަވާލަންޖެހޭ ކަމަށެވެ.
ޓޮޓެންހަމުގެ އާ ސްޓޭޑިއަމް އަޅަން ފައިސާ ހޭދަ ކުރުމަށް ޕޮޗެޓީނޯ މިދިޔަ ދެ ސީޒަނުގައި ކުޅުވީ ކުޅުންތެރިއަކު ނުގަނެއެވެ.