އަފްގާނިސްތާނުގެ ކުރީގެ ކެޕްޓަން ހާރޫން އަމީރީ އަށް ނިއުއިން ދޭން ޖެހޭ މުސާރަ ދޭން އެންގުމުން އެކަމަށް އިޖާބަދީފައިނުވާތީވެ ނިއު އަށް ކުޅުންތެރިން ނުގެނެވޭގޮތަށް ސަސްޕެންޑްކުރަން ފީފާއިން ނިންމައިފި އެވެ.
ދުނިޔޭގެ މައި ފުޓްބޯޅަ ޖަމާއަތުގެ ސަސްޕެންޝަނެއް ބޯމަތިވީ އެފްއޭއެމުން ނިއު ފުޓްބޯޅައިގެ ހުރިހާ ހަރަކާތަތަކުން ސަސްޕެންޑްކޮށްފައި އޮއްވަ އެވެ. އެއީ ދިވެހި ކުޅުންތެރިންނަށް މުސާރަނުދޭ މައްސަލާގަ އެވެ.
ފީފާއިން ފެބްރުއަރީ މަހުގެ 6 ވަނަ ދުވަހު ނިއު އަށް އަންގާފައިވަނީ ހާރޫން އަމީރީގެ އެކައުންޓް ނަންބަރު ލިބޭތާ 40 ދުވަހުގެ ތެރޭގައި އޭނާ އަށް 43000ވުރެ ގިނަ ޑޮލަރު ދިނުމަށެވެ. މިއީ ދެ މަހުގެ މުސާރަ އާއި ގަވާއިދާ ހިލާފަށް ކޮންޓްރެކްޓް އުވާލީތީވެ އޭގެ ބަދަލެއްގެ ގޮތުން ދޭން ޖެހޭ ފައިސާ އެވެ. ނަމަވެސް ނިއުއިން ތިބީ މިކަމާ އަޅާނުލަ އެވެ.
ފީފާއިން ބުނެފައިވަނީ މި ފައިސާ ޖަމާކުރުކަން ނިއުއަށް ސާބިތުކޮށްނުދެވިއްޖެނަމަ އެޓީމަށް އެއްވެސް ކުޅުންތެރިއަކު ރަޖިސްޓްރީ ނުކުރެވޭނެ ކަމަށެވެ. އެއީ ދިވެހި އަދި ބިދޭސީ ކުޅުންތެރިން ހިމެނޭ ގޮތަށެވެ.
ހާރޫން އަމީރީ ނިއުއާ ދެކޮޅަށް މައްސަލަ ޖެއްސީ ޓީމާމެދު ހިތްހަމަނުޖެހިގެން ފުރައިގެން ދިއުމަށްފަހު އެވެ. އޭނާ މާލޭގައި ހުރި ތަނުން ނެރުނު މައްސަލާގައި ނިއުގެ މެނޭޖްމަންޓާ ބޮޑު ޒުވާބުގަނޑެއް ވެސް ހިނގި އެވެ.
އޭނާގެ އިތުރުން ނިއުއަށް މިދިޔަ ދެ އަހަރު ކުޅުނު 8 ކުޅުންތެރިއެއްގެ މައްސަލަ ވެސް ފީފާއިން ދަނީ ބަލަމުންނެވެ. އަދި ދިވެހި ކުޅުންތެރިންނަށް އެކަނި ވެސް އެކުލަބުން 3.8 މިލިއަން ރުފިޔާ ދައްކަން ޖެހެ އެވެ.
ނިއުއިން މިހާތަނަށް ބުނަމުން އައީ އެފްއޭއެމުގެ ސަސްޕެންޑްކުރީ ޒާތީވެގެން ކަމަށެވެ. ނަމަވެސް ފީފާއިން ވަނީ އެފްއޭއެމުގެ ސަސްޕެންޝަނަށް ވެސް ތާއީދުކޮށްފަ އެވެ.