މާދަމާއިން ފެށިގެން ރާއްޖޭގެ ހުރިހާ ސްކޫލެއްގެ ދަރިވަރުންނަށް ހެނދުނުގެ ނާސްތާ ދެމުންދާނެކަމަށް އެޑިއުކޭޝަން މިނިސްޓްރީން ވިދާޅުވެއްޖެއެވެ.
ސަރުކާރުގެ 100 ދުވަހުގެ ވަޢުދުތަކުގެ ތެރޭގައި ހިމެނޭ ސްކޫލް ކުދިންނަށް ހެނދުނުގެ ނާސްތާ ދިނުމުގެ ޕައިލެޓް ޕްރޮޖެކްޓް ރާއްޖޭގައި 25 ސްކޫލެއްގައި ވަނީ ފަށާފައެވެ. ބާކީ ހުރި 188 ސްކޫލްގައި މި ޕްރޮގްރާމު ފެށުމަށް ހަމަޖެހިފައިވަނީ މާދަމާ ހެނދުނު އެވެ.
އެެޑިއުކޭޝަން މިނިސްޓްރީން ވިދާޅުވީ ދެވަނަ ޓާމް ފެށޭ ދުވަހު ރާއްޖޭގެ ހުރިހާ ސްކޫލެއްގައި ހެދުނު ނާސްތާ ދިނުމަށް ތައްޔާރުވިނަމަވެސް މާދަމާއަށް އެކަން ލަސްކޮށްލީ ހަ ރޯދައަށް ދިމާވުމުންކަމަށެވެ. ރާއްޖޭގެެ ހުރިހާ ސްކޫލެއްގައި ހެދުނު ނާސްތާ ޕްރޮގްރާމު ފެށުމުގެ ރަސްމިއްޔާތު އޮންނާނީ މާދަމާ ހެނދުނު 6:40 ތާޖުއްދީން ސްކޫލްގައެވެ.
ނަސްތާ ޕްރޮގްރާމް ނުފެށި ހުރި ސްކޫލް ތަކަށް ނާސްތާ ތައްޔާރުކޮށްދޭނެ ފަރާތެއް ހޯދަން އެޑިއުކޭޝަން މިނިސްޓްރީން ހުޅުވާލީ މިދިޔަ މަހުގެ 9 ވަނަދުވަހުއެވެ.
ސްކޫލްތަކުގެ ދަރިވަރުންނަށް ހެނދުނުގެ ނާސްތާ ދިނުމުގެ ޕައިލެޓް ފްރޮގްރާމް ފެށީ މިއަހަރުގެ ދިރާސީ އަހަރާއިއެކުއެވެ. ސްކޫލްތަކުގައި ހެނދުނުގެ ނާސްތާ ޕްރޮގްރާމް ކުރިއަށް ގެންދަން ފެށުމުން ދަރިވަރުންގެ ހާޒިރީ ރަގަޅުވެ ތަރުޙީބު ލިބެމުންދާކަމަށް އެޑިއުކޭޝަން މިނިސްޓްރީން ވަނީ ވިދާޅުވެފައެވެ.
ސްކޫލް ދަރިވަރުންނަށް ހެނދުނުގެ ނާސްތާ ދިނުމުގެ ޕައިލެޓް ޕްރޮޖެކްޓްގެ ދަށުން ޔުނިސެފްގެ އެހީއާއެކު އެޑިއުކޭޝަން މިނިސްޓްރީން ވަނީ ނާސްތާއަށް 10 މެނޫއެއްވެސް ތައްޔާރުކޮށްފައެވެ. އަދި މާދަމާ ހުރިހާ ސްކޫލެއްގައި މި ޕްރޮގްރާމް ފަށާއިރު އިތުރު މެނޫތަކެއްވެސް ތައްޔާރުކުރުމުގެ މަސައްކަތް ކުރަމުންދާކަމަށް އެޑިއުކެޝަން މިނިސްޓްރީން ވަނީ ވިދާޅުވެފައެވެ.
ދައުލަތުގެ ބަޖެޓުން 50 މިލިއަނަށްވުރެ ގިނަ ރުފިޔާ ޚަރަދުކޮށްގެން ފެށި މި ޕްރޮގްރާމް ފުރަތަމަ ހިންގަން ފެށީ މާލޭގެ 3 ސްކޫލަކާއި ވިލިމާލޭގެ 1 ސްކޫލާއި ހުޅުމާލޭގެ ސްކޫލެއްގެ އިތުރުން ރާއްޖޭގެ ކޮންމެ އަތޮޅަކުން އެއް ސްކޫލްގައެވެ.