ޔޫރަޕުގެ އެންމެ މޮޅު ކުޅުންތެރިޔާ އަށް ދޭ ބެލޮންޑީއޯ އެވޯޑަކީ ވަރަށް ބޮޑު ޝަރަފެއް ކަމަށް ލިވަޕޫލްގެ ޑިފެންޑަރު ވާޖިލް ވެންޑައިކް ބުނެފި އެވެ.
އޭނާ މިހެން ބުނިއިރު މި އަހަރު އެވޯޑް ލިބުން އެންމެ ގާތް ކުޅުންތެރިއަކީ ވެސް އޭނާ އެވެ.
"ހަމަ ޔަގީން އެވޯޑަކީ ވަރަށް ބޮޑު ޝަރަފެއް. އަހަންނަށް ލިބިއްޖެނަމަ އަހަރެން އެވޯޑް އުފުލާލާނަން. އެކަމަކު އެއީ އަހަރެން އިތުރަށް ކުރިއަށް ދާން ޖެހޭ ކަމުގެ ހެއްކަކަށް ވެސް ވާނެ. އަހަރެން ދެކޭ ގޮތުގައި ބެލޮންޑީއޯ ލިބިގަތުމަށް އަހަރެން އަދި ކުރިއަރަންޖެހޭ،" ވެންޑައިކް ބުންޏެވެ.
ނެދަލޭންޑްސްގެ ކެޕްޓަންކަން ވެސް ކުރަމުން އަންނަ ކުޅުންތެރިޔާ ބުނީ އޭނާ އަށްވުރެ އެވޯޑް ލިބުން ހައްގު ކުޅުންތެރިން އެބަތިބި ކަމަށެވެ. އޭގެ ތެރެއިން އެއް ކުޅުންތެރިއަކަށް އޭނާ ފާހަގަ ކުރީ ބާސެލޯނާގެ ކެޕްޓަން ލަޔޮނަލް މެސީ އެވެ.
ވެންޑައިކް ބުނީ ލިވަޕޫލަށް ބަދަލުވި ފަހުން އޭނާގެ ކުޅުން ވަރަށް ބޮޑަށް ކުރިއަރައިފި ކަމަށާއި ނަމަވެސް ބެލޮންޑީއޯ އެވޯޑް ހޯދުމަށްވުރެ އޭނާގެ އަމާޒުހުރީ ޕްރެމިއާ ލީގު ލިވަޕޫލަށް ހޯދައިދޭން ކަމަށެވެ.
"އަހަރުމެން އެބަޖެހޭ މިދިޔަ ސީޒަނުގައި ކުރި މަސައްކަތް މި ސީޒަނުގައި ވެސް ކުރަން. މިދިޔަ ސީޒަނުގައި ލިުނު 97 ޕޮއިންޓް މިސީޒަނުގައި ވެސް ހޯދައިގެން މެނުވީ ޕްރެމިއާ ލީގު ހޯދަން ދަތިވާނެ،" ވެންޑައިކް ބުންޏެވެ.