ރެކޯޑް އަގަކަށް ހެރީ މެގުއާ މެންޗެސްޓާ އަށް

ލެސްޓާ ސިޓީގެ ޑިފެންޑަރު ހެރީ މެގުއާ ދުނިޔޭގެ ރެކޯޑް އަގަކަށް މެންޗެސްޓާ ޔުނައިޓެޑަށް ބަދަލުވާން ނިންމައިފި އެވެ.

އޭނާ ގަތުމަށް ޔުނައިޓެޑުން 80 މިލިއަން ޕައުންޑް ހަރަދުކުރާނެ އެވެ. މިއީ ދުނިޔޭގައި މިހާތަނަށް ޑިފެންޑަރަކު ގަތުމަށް ކުރާ އެންމެ ބޮޑު ހޭދަ އެވެ. އަދި ދުނިޔޭގެ 11 ވަނަ އަށް އެންމެ އަގުބޮޑު ޓްރާންސްފާ އެވެ.

މިހާތަނަށް އެންމެ އަގުބޮޑުކޮށް ކުލަބު ބަދަލުކުރި ޑިފެންޑަރަކީ ލިވަޕޫލްގެ ވާޖިލް ވެންޑައިކެވެ. އޭނާ ލިވަޕޫލުން ގަތީ 75 މިލިއަން ޕައުންޑަށެވެ.

އުމުރުން 26 އަހަރުގެ މިގުއާ އަކީ އިނގިރޭސި ގައުމީ ޓީމުގެ ވެސް ވަރަށް މުހިންމު ކުޅުންތެރިއެކެވެ.

ޝެފީލްޑް ޔުނައިޓެޑުން 2011 ވަނަ އަހަރު ސީނިއާ ކެރިއަރު ފެށި މެގުއާ ވަނީ 2014 ވަނަ އަހަރު ހަލް ސިޓީ އަށް ބަދަލުވެފަ އެވެ. ލެސްޓާ އިން އޭނާގެ ސޮއި ހޯދީ 2016 ވަނަ އަހަރު އެވެ. އެ ފަހަރު ލެސްޓާ އިން ވަނީ 20 މިލިއަން ޑޮލަރުގެ ޓްރާންސްފާ ފީ އެއް ދައްކައިފަ އެވެ.

ޔުނައިޓެޑުގެ ކޯޗު އޮލޭގަނާ ސޮލިޝަޔާ ބުނީ މިގުއާ އަކީ ދުނިޔޭގެ ފެންވަރުގެ ޑިފެންޑަރެއް ކަމަށާއި އޭނާ އައުމުން ޔުނައިޓެޑްގެ ފަހަތް ވަރަށް ބޮޑަށް އޮގަނައިޒްވާނެ ކަމަށެވެ. އަދި ޔުނައިޓެޑުން އޭނާ އަށް ބޮޑު އަގެއް ހޭދަކުރަން ނިންމީ މިއީ އެއްވެސް ޓީމަކުން ދޫކޮށްލާނެ ކުޅުންތެރިއަކަށް ނުވާތީ ކަމަށެވެ.