ޓޮޓެންހަމުގެ މިޑްފީލްޑަރު ޑެލޭ އަލީ އަށް ކުރިއަށް އޮތް ސީޒަނުގެ ފުރަތަމަ މެޗުތަކުގައި ނުކުޅެވޭނެ ކަމަށް ކޯޗު މައުރީސިއޯ ޕޮޗެޓިނޯ ބުނެފި އެވެ.
އިންޓަމިލާނާ ދެކޮޅަށް ކުޅުނު މެޗަށް ފަހު ޕޮޗެޓިނޯ ބުނީ މިދިޔަ ސީޒަނުގައި ގައުމީ ޓީމާއި ކުލަބަށް 45 މެޗު ކުޅެދިން ކުޅުންތެރިޔާގެ ހާލަތާމެދު ކަންބޮޑުވާ ކަމަށެވެ. ސަބަބަކީ މިދިޔަ ފެބްރުއަރީ މަހުން ފެށިގެން ގިނަ އަދަދެއްގެ އިންޖަރީތަކުގައި އުޅެން ޖެހުން ކަމަށެވެ.
"އޭނާ އަކީ އަދި ވަރަށް ޒުވާން ކުޅުންތެރިއެއް. އެކަމަކު އަހަރުމެން އެންމެންވެސް އޭނާގެ ހާލަތާމެދު ކަންބޮޑުވަން. އޭނާ މިވަގުތު ހުރީ ފަރުވާއަށް ބޭނުންވެފައި. ސީޒަން ހުޅުވާދުވަހު ކުޅެން ޖެހޭ މެޗުގައި ނުކުޅެވޭނެ. އަލީ އަކީ ޓީމަށް ވަރަށް މުހިންމު ކުޅުންތެރިއެއް،" ކޯޗު ބުންޏެވެ.
ޕޮޗެޓީނޯ ބުނީ އާ ސީޒަނަށް ޓީމު އޮތީ ރަނގަޅަށް ތައްޔާރުވެފައި ކަމަށާއި އުއްމީދަކީ މިދިޔަ ސީޒަނުގައި ހޯދި ތިން ވަނަ މަގާމަށްވުރެ ކުރިއަށް ދިއުން ކަމަށެވެ.