ފްރެންޗް ލީގުގެ ފުރަތަމަ މެޗުގައި ޕީއެސްޖީ އަށް ނުކުޅެން އެ ޓީމުގެ ބްރެޒިލް ފޯވަޑް ނޭމާ ސަންޓޯސް ނިންމައިފި އެވެ.
ނިމެސްއާ ދެކޮޅަށް ނުކުޅެން އޭނާ ނިންމީ ކުލަބު ބަދަލު ކުރުމަށް ކުރާ މަސައްކަތަށް އިތުރު ބާރެއް ލުމުގެ ގޮތުންނެވެ.
ދުނިޔޭގެ ރެކޯޑް ފީއެއް ކަމަށްވާ 222 މިލިއަން ޕައުންޑަށް މީގެ ދެ އަހަރު ކުރިން ޕީއެސްޖީ އަށް ބަދަލުވި ކުޅުންތެރިޔާ ދާން ބޭނުންވަނީ ކުރީގެ ކުލަބު ބާސެލޯނާ އަށެވެ.
ނަމަވެސް ޕީއެސްޖީން ބުނާ ވަރަށް ބާސެލޯނާ އަށް ފައިސާ ދެވޭކަށް ނެތެވެ. އެ ކުލަބުން ހުށަހަޅަނީ ބަދަލުގައި ދެ ކުޅުންތެރިއަކާއި 40 މިލިއަން ޕައުންޑެވެ.
މިއާ ހިލާފަށް ވާދަވެރި ރެއާލް މެޑްރިޑުން ވަނީ ދުނިޔޭގެ އެންމެ މޮޅު ކުޅުންތެރިޔާ ލޫކާ މޮޑްރިޗާއި 100 މިލިއަން ޕައުންޑަށް ނޭމާ ގަތުމަށް ހުށަހަޅާފަ އެވެ. ނަމަވެސް ރެއާލް އަށް އޭނާ ވިއްކާނުލުމަށް ނޭމާ ވަނީ ޕީއެސްޖީގެ ކިބައިން އެދިފަ އެވެ.