ކޮރޯނާވައިރަސްއާ ގުޅިގެން މިއަހަރުގެ ނިޔަލަށް ގޭގައި ތިބެގެން މަސައްކަތްކުރުމުގެ ފުރުޞަތު ގޫގުލްއާއި ފޭސްބުކްގެ މުވައްޒަފުންނަށް ދީފިއެވެ.
ކުރިއަށްއޮތް ދެތިން މަސްދުވަހުގެ ތެރޭގައި މުވައްޒަފުން އޮފީހަށް ނެރުމަށް ފޭސްބުކްއާއި ގޫގުލްއިން ކުރިން މަސައްކަތްކުރި ނަމަވެސް، މިހާރު އެ ވިސްނުން ވަނީ ބަދަލުކޮށްފައެވެ. އަދި މިއަހަރުގެ ނިޔަލަށް ގޭގައި ތިބެގެން މަސައްކަތްކުރުމުގެ ފުރުޞަތު މުވައްޒަފުންނަށް މިހާރު ދީފައިވާކަމަށް ގޫގުލްއާއި ފޭސްބުކްއިން ބުނެއެވެ.
ގޫގުލްއިން ކުރިން މަސައްކަތްކުރީ ޖޫންމަހުގެ 1 ވަނަ ދުވަހުން ފެށިގެން މުވައްޒަފުން އޮފީހަށް ނެރޭށެވެ. ނަމަވެސް އިތުރު 7 މަސް ދުވަހު މުވައްޒަފުން ގޭގައި ތިބެގެން މަސައްކަތްކުރާ ގޮތަށް މިހާރު އެކުންފުނިން ވަނީ ނިންމާފައެވެ. ގޫގުލްގެ ސީއީއޯ ސުންދަރު ޕިޗާއީ ވިދާޅުވީ އޮފީހަށް ނިކުންނަށް ބޭނުންވާ މުވައްޒަފުންނަށް، ރައްކާތެރިކަމުގެ ފިޔަވަޅުތަކާއެކު އޮފީހަށް ނިކުތުމުގެ ފުރުޞަތު ދޭނެކަމަށެވެ.
ފޭސްބުކްއިން ކުރިން ނިންމާފައި އޮތީ ޖުލައިމަހުގެ 6 ވަނަ ދުވަހު އޮފީސްތައް ހުޅުވުމަށެވެ. ނަމަވެސް ގޫގުލްގެ ނިންމުމާއެކު ފޭސްބުކްއިން ވަނީ އެކުންފުނީގެ މުވައްޒަފުންނަށް މިއަހަރުގެ ނިޔަލަށް ގޭގައި ތިބެގެން މަސައްކަތްކުރުމުގެ ފުރުޞަތު ދީފައެވެ. އަދި އޮފީހަށް ކޮންމެހެން ނިކުންނަންޖެހޭ މުވައްޒަފުން ކުރިއަށް އޮތް ދުވަސްތަކުގައި ކަނޑައެޅިގެން ދާނެކަމަށްވެސް ފޭސްބުކްއިން ބުނެއެވެ.
ކޮރޯނާވައިރަސް ފެތުރެން ފެށުމާއެކު މުވައްޒަފުން ގޭގައި ބައިތިއްބައިގެން މަސައްކަތްކުރަން ފެށި އެންމެ ފުރަތަމަ އެއް ކުންފުންޏަކީ ފޭސްބުކްއެވެ. އަދި 1000 ޑޮލަރުގެ ބޯނަހެއްވެސް އެކުންފުނީގެ މުވައްޒަފުންނަށް ދީފައިވެއެވެ.
ކޮރޯނާވައިރަސްގެ ސަބަބުން ގިނަ ކުންފުނިތަކުގެ މުވައްޒަފުން ގޭގައި ތިބެގެން މަސައްކަތްކުރާއިރު، އޮފީސްތަކަށް ނިކުންނަށް މުވައްޒަފުން އޮފީހަށް ނިކުންނަނީ ރައްކާތެރިކަމުގެ ފިޔަވަޅުތަކާއެކުއެވެ.