"ވެށިފަހި"ގެ ދަށުން ފްލެޓާއި ގޯތި ނުލިބޭ މީހުންނަށް އަނެއްކާވެސް ޝަކުވާ ހުށަހެޅުމުގެ ފުރުޞަތު ހުޅުވާލައިފި

"ވެށި ފަހި މާލެ ޕްރޮގްރާމް"ގެ ދަށުން ފްލެޓާއި ގޯތި ލިބޭނެކަމުގެ ލިޔުން ލިބުނު މީހުންގެ ތެރެއިން މިހާތަނަށް އެކަން ހަމަނުޖެހިވާ ފަރާތްތަކަށް އެކަމުގެ ޝަކުވާ ހުށަހެޅުމަށް ހުޅުވާލި މުއްދަތު އިތުރުކޮށްފިއެވެ.

މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރއިން ވިދާޅުވީ، 2010 ވަނަ އަހަރު ފެށި ބޯހިޔާވަހިކަމުގެ މަޝްރޫޢު "ވެށި ފަހި މާލެ ޕްރޮގްރާމް"ގެ ދަށުން މާލެއިން ދޫކޮށްލާ ބިމުގެ ބަދަލުގައި ހުޅުމާލެއިން ގޯތި ލިބޭކަން އަންގައި، ލިޔުންދީފައިވާ ފަރާތްތަކުގެ ތެރެއިން މިހާތަނަށް ބޯހިޔާވަހިކަން ހަމަޖެހިފައިނުވާ ފަރާތްތަކަށް ހައްލެއް ހޯދުމަށް ސަރުކާރުން މަސައްކަތް ކުރަމުންދާކަމަށެވެ.

މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރއިން ވިދާޅުވީ، ވެށިފަހި މާލެ ޕްރޮގްރާމްގެ ދަށުން މާލެއިން ދޫކޮށްލާ ބިމުގެ ބަދަލުގައި ހުޅުމާލެއިން ގޯތި ނުވަތަ ފްލެޓް ލިބޭނެކަމަށް ސަރުކާރުން ލިޔުން ދޫކޮށްފައިވާ ފަރާތްތަކުގެ ތެރެއިން މިހާތަނަށް ބޯހިޔާވަހިކަން ހަމަނުޖެހިތިބި ހުރިހާ ފަރާތްތަކަށް ގޯތިދޫކުރުމުގެ މަސައްކަތް މިހާރު ފަށާފައިވާކަމަށެވެ. އެގޮތުން މި މަސައްކަތް ކުރުމަށްޓަކައި މިފަދަ ފަރާތްތަކުގެ ފުރިހަމަ މަޢުލޫމާތު ބޭނުންވާތީ ވެށި ފަހިމާލެ ޕްރޮގްރާމުގެ ދަށުން މިހާތަނަށް، ބޯހިޔާވަހިކަން ހަމަނުޖެހިތިބި ފަރާތްތަކުން އެކަން ލިޔުމުން ހުށަހެޅުއްމަށް އެ މިނިސްޓްރީން ވަނީ އަންގާފައެވެ.

މިކަމާއި ގުޅިގެން ހައުސިންގް މިނިސްޓްރީއިން ނެރުނު ބަޔާނެއްގައި ވަނީ، ވެށިފަހި މާލެ ޕްރޮގްރާމުގެ ދަށުން ޢަރަބިއްޔާ އަދި ގައުކޮށިން ފްލެޓް ދޭނެ ކަމަށް ސަރުކާރުން ލިޔުން ދިނުމަށްފަހު ފްލެޓް ހަވާލުނުކުރާ މީހުން ތިބިކަން ފާގަފަކޮށްފައެވެ. އަދި، މާލޭގެ ބިން ކޮޅު ދޫކޮށްލުމުން ހުޅުމާލެއިން ބިން ދޭނެ ކަމަށްބުނެ ސަރުކާރުން ލިޔުންދިން ފަރާތްތަކުގެ ތެރެއިން ބިން ހަވާލުނުކުރެވިވާ ފަރާތްތައް ތިބިކަންވެސް އެ ނުބުސްޓްރީން ވަނީ ފާހަގަކޮށްފައެވެ.

ހައުސިންގ މިނިސްޓްރީން ވިދާޅުވީ މިފަދަ ފަރާތްތަކުން ޝަކުވާ ހުށަހަޅާއިރު، ވެށި ފަހި މާލެ ޕްރޮގްރާމުގެ ދަށުން މާލެއިން ދޫކޮށްލާ ބިމުގެ ބަދަލުގައި ހުޅުމާލެއިން ގޯތި ނުވަތަ ގައުކޮށްޓާއި ޢަރަބިއްޔާ ހުރި ބިމުގައި އިމާރާތްކުރި ފްލެޓްތަކުން ފްލެޓް ލިބޭނެ ކަމަށް އެންގި ލިޔުމާއި ވެށިފަހި މާލެ ޕްރޮގްރާމުގެ ދަށުން މާލެއިން ދޫކޮށްލާ ބިމުގެ ބަދަލުގައި ހުޅުމާލެއިން ގޯތި ލިބޭކަން އަންގާ ލިޔުން ހުށަހަޅަން ޖެހޭނެކަމަށެވެ. މީގެ އިތުރުން ދިވެހިރައްޔިތެއްކަން އަންގައިދޭ ކާޑުގެ ކޮޕީއާއި، ދޫކޮށްލުމަށް އެއްބަސްވީ ގޭގެ ރަޖިސްޓްރީގެ ކޮޕީ ހުށަހަޅަން ޖެހެއެވެ.

ހައުސިންގް މިނިސްޓްރީއިން ވިދާޅުވީ، މިފަދަ ފަރާތްތަކުން 23 ޖުލައި 2020 ވަނަ ދުވަހުގެ 13:00 ގެ ކުރިން ލިޔެ ކިޔުންތައް ހުށަހަޅަން ޖެހޭނެކަމަށެވެ.

"ވެށި ފަހި މާލެ ޕްރޮގްރާމް"ގެ ދަށުން މިހާތަނަށް ފްލެޓާއި ގޯތި ނުލިބޭ ފަރާތްތަކުން އެކަން ހައުސިންގ މިނިސްޓްރީއަށް އެންގުމަށް މިއަހަރުގެ ކުރީކޮޅު އެދިފައިވީނަމަވެސް ރާއްޖޭގައި ކޯވިޑް-19ގެ ހާލަތު ގޯސްވުމުގެ ސަބަބުން މި މަސައްކަތް ވަނީ ހުއްޓިފައެވެ.

ވެށި ފަހި މާލެ ޕްރޮގްރާމަކީ މާލޭގައި ދިރިއުޅޭ ފަރާތްތަކުގެ ތެރެއިން ބޯހިޔާވަހިކަން އެންމެ ބޮޑަށް ބޭނުންވެފައިތިބި ފަރާތްތަކަށް ހައްލެއް ހޯދައިދިނުމުގެ ގޮތުން ކުރީގެ ރައީސް މުޙައްމަދު ނަޝީދުގެ ވެރިކަމުގައި 2010 ވަނަ އަހަރު އިފްތިތާޙްކުރި ޕްރޮގްރާމެކެވެ. އެ ޕްރޮގްރާމުގެ ދަށުން 3 ކެޓެގަރީއަކުން ކުރިމަތިލުމަށް ހުޅުވާލާފައިވެއެވެ. އެގޮތުން ކުދި ބިން ތަކުގައި ދިރިއުޅޭ މާލޭގެ ރަށްވެހިންނާއި، ދިރިއުޅޭނެ އަމިއްލަ ތަނެއް ނެތް މާލެއަށް އުފަން ރަށްވެހިންގެ އިތުރުން މުނިސިޕަލްޓީގެ ދަފްތަރުގައި، 30 ޖޫން 2011 ގެ ނިޔަލަށް ރަޖިސްޓްރީވެފައިވާ މީހުންނަށެވެ. އޭގެ ތެރެއިން ބައެއް ފަރާތްތަކަށް ފްލެޓާއި ގޯތި ލިބިފައިވާއިރު، ފަހުން އެ މަޝްރޫޢު ކުރިއަށްގެންގޮސްފައިވަނީ ރައީސް ޔާމީންގެ ސަރުކާރުން އެޗް.ޑީ.ސީއާއި ހަވާލުކޮށްގެންނެވެ.