މިދިޔަ ނޮވެމްބަރު މަހުގެ 23 ވަނަ ދުވަހުގެ ރޭ ގދ. ތިނަދޫ ފަޅުގައި އަޅާފައި އޮތް ދޯންޏެއްގައި ހިނގި އަލިފާނުގެ ޙާދިސާގައި ފިހުނު މީހުންގެ ތެރެއިން މީހަކު ނިޔާވެއްޖެއެވެ.
މިއީ މިޙާދިސާގައި ފިހިގެން ލިބުނު އަނިޔާތަކަށް ފަރުވާ ދެމުން ދަނިކޮށް ނިޔާވި 2 ވަނަ މީހާއެވެ.
ޕީއެސްއެމް ނިއުސްއަށް މަޢުލޫމާތު ދެއްވަމުން އައިޖީއެމްއެޗުން ވިދާޅުވީ ގދ. ތިނަދޫގައި ހިނގި އަލިފާނުގެ ޙާދިސާގައި ފިހިގެން ފަރުވާ ދެމުން ދަނިކޮށް ނިޔާވި ދެވަނަ މީހާގެ ހަށިގަނޑުގެ 50 އިންސައްތަ ފިހިފައިވާކަމަށެވެ. މިޙާދިސާގައި ނިޔާވެފައިވަނީ ދިވެހި ފިރިހެނެއްކަމަށް އައިޖީއެމްއެޗުން ވިދާޅުވެއެވެ. މިޙާދިސާގައި 4 މީހަކު ފިހިފައިވާއިރު އޭގެ ތެރެއިން ޙާލު ސީރިއަސް ވީ މީހަކަށް ފަރުވާދެމުން ދަނިކޮށް މިދިޔަ އަންގާރަ ދުވަހުވެސް ވަނީ ނިޔާވެފައެވެ.
ތިނަދޫ ފަޅުގައި އޮތް ރާސްތާ ދޯނީގައި އަލިފާން ރޯވީ ދޯނީގައި ހުރި ގޭސްފުޅިއެއް ލީކުވެފައިވަނިކޮށް އުނދުން ރޯކުރުމުން ގޭސްފުޅި ގޮވައިގެންކަމަށް އެމްއެންޑީއެފުން ވަނީ ވިދާޅުވެފައެވެ.
މިޙާދިސާގައި ފިހުނު މީހުންނަށް ތިނަދޫ އަބްދުއްސަމަދު މެމޯރިއަލް ހޮސްޕިޓަލުގައި ފަރުވާދިނުމަށްފަހު އިތުރު ފަރުވާއަށް ވަނީ މާލެ ގެނެސްފައެވެ.