އެމްޕީއެލްއިން ދެމުންގެންދިޔަ ޢާއްމު ދަތުރުފަތުރުގެ ޚިދުމަތް އެމްޓީސީސީން، ކުރިއަށް އޮތް 50 އަހަރު ކުރިއަށް ގެންދިއުމުގެ އެއްބަސްވުމުގައި ސޮއިކޮށްފިއެވެ. މި އެއްބަސްވުމުގެ ދަށުން އެމްޕީއެލްއިން ދެމުން އައި ބަހުގެ ޚިދުމަތާއި ކަނޑުމަގުން ދެމުން އައި ފެރީގެ ޚިދުމަތް މިއަދުން ފެށިގެން އެމްޓީސީސީން ކުރިއަށް ގެންދާގޮތަށް ހަމަޖެހިގެންދާނެކަމަށް އެކުންފުނިން ވިދާޅުވެއެވެ.
މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ ރަސްމީ މަސައްކަތުގައި ދަތުރުފަތުރުގެ ޚިދުމަތް ދިނުން ހިމެނިފައިވުވިނަމަވެސް އެކުންފުނިންވަނީ ވޭތުވެދިޔަ 5 އަހަރުދުވަހުގެ ތެރޭގައި މިމަސައްކަތް ކޮށްފައެވެ. އެގޮތުން 3 މިލިއަނަށްވުރެ ގިނަ ދަތުރުވެރިން ބަހުގައި އުފުލާފައިވެއެވެ. އަދި ޚިދުމަތުގެ ފެންވަރު ރަނގަޅުކުރުމަށް ޒަމާނީ އެތައް ވަޞީލަތެއް އެކުންފުނިންވަނީ ތަޢާރަފުކޮށްފައެވެ.
މިދަތުރުފަތުރުގެ ޚިދުމަތް ދިނުމާ މިހާރު މިވަނީ އެމްޓީސީސީން ޙަވާލުވެފައެވެ. މިޚިދުމަތް ދިނުމާ ރަސްމީކޮށް ޙަވާލުވެވަޑައިގެން އެމްޓީސީސީގެ ސީއީއޯ އާދަމް އާޒިމް ވިދާޅުވީ އެމްޕީއެލްއިން ޚިދުމަތްދެމުން އައީ ވަރަށްވެސް ޒަމާނީ ފެންވަރެއްގައިކަމަށާ، އެކުންފުނިން ދެމުންއައި ޚިދުމަތުގެ ފެންވަރު ހިފަހައްޓައި އިތުރަށް ކުރިއެރުވުމަކީ އެމްޓީސީސީއަށް އޮތް ވަރުގަދަ ގޮންޖެހުމެއްކަމަށް އޭނާ ވިދާޅުވިއެވެ. އަދި ރާއްޖޭގެ އުތުރާއި ދެކުނުގައި އެއްގަމާއި ކަނޑުގައި ދެމުންގެންދާ ދަތުރުފަތުރުގެ ޚިދުމަތް ވަރުގަދަ ނިޒާމެއްގެ ތެރެއިން ޤާއިމުކޮށްދެއްވާނެކަމުގެ ޔަގީންކަން އާޒިމްވަނީ ދިވެހި ރައްޔިތުންނަށް ދެއްވާފައެވެ.
"ޕަބްލިކް ޓްރާންސްޕޯޓެއް ދިނުމަށް ވަރަށް މުހިންމުކަމެއް ވަގުތުން ވަގުތަށް ޚިދުމަތް ދިނުމަކީ. އެހެން ނޫނީ ރައްޔިތުން ޚިދުމަތަށް ކުރަންޖެހޭ އިތުބާރު ގެއްލިގެންދާނެ. އެމްޕީއެލްއިން ޚިދުމަތް ދިނުމުގައި ވަރަށްބޮޑަށް އެކަމަށް ބަލާފައިވޭ. އެހެންވީމަ އެމްޓީސީސީއަށް ޖެހޭނެ އެމްޕީއެލްދިން ދިން ޚިދުމަތަށްވުރެ ރަނގަޅު ޚިދުމަތެއް ދޭން." އާދަމް އާޒިމް ވިދާޅުވިއެވެ.
މިރަސްމިއްޔާތުގައި ވާހަކަދައްކަވަމުން އެމްޕީއެލްގެ ސީއީއޯ ޝާހިދު ޢަލީ ވިދާޅުވީ އެކުންފުނިން ޚިދުމަތް ދެމުންގެންދިޔައީ ޤައުމީ ރޫޙެއްގައިކަމަށެވެ. ކާމިޔާބު ސިއްރަކީއެއިކަން ފާހަގަކުރައްވައި ވޭތުވެ ދިޔަ މުއްދަތުގެ ތެރޭގައި ރައްޔިތުންނަށް އަސާސީ މުހިއްމު ޚިދުމަތެއް ފޯރުކޮށްދެވުނުކަމުގެ ހިތްހަމަޖެހުން އޮތްކަން އޭނާ ފާހަގަކުރެއްވިއެވެ. އަދި ރާއްޖޭގެ ދަތުރުފަތުގެ މައި ކުންފުނި، އެމްޓީސީސީއާ ޙަވާލުވި ހިސާބުން މިޚިދުމަތް އިތުރަށް ކުރިއަރާނެކަމުގެ ޔަގީންކަން އޮތްކަމަށްވެސް ޝާހިދުވަނީ ވިދާޅުވެފައެވެ.
"270އެއްހައި މުވައްޒަފުންނާއެކު ވޭތުވެދިޔަ ތަނުގައިވަނީ ރަނގަޅު ޚިދުމަތެއް ދެވިފައި. މި، ކޯވިޑް ދުވަސްވަރުވެސް އެމްޕީއެލްގެ ދަތުރުފަތުރުވެގެންދިޔައީ ކޯވިޑް އޮޕަރޭޝަނުގައިވެސް މުހިއްމު ދައުރެއް އަދާކުރި ޓީމަކަށް." ޝާހިދު ވިދާޅުވިއެވެ.
އެމްޕީއެލްއިން ދެމުންދިޔަ ދަތުރުފަތުގެ ޚިދުމަތް އެމްޓީސީސީގެ ދަށަށް ބަދަލުކުރުމަށް 60 ދުވަސް، އިންތިޤާލީ މުއްދަތެއްގެ ގޮތުގައިވަނީ ކަނޑައަޅާފައެވެ. މިބަދަލާއެކު އެމްޕީއެލްގައި ދަތުރުފަތުގެ ޚިދުމަތް ދިނުމަށް މަސައްކަތްކުރަމުންގެންދިޔަ މުވައްޒަފުން އެމްޓީސީސީއަށް ބަދަލުވާނެކަމަށް އެމްޕީއެލްއިން ވިދާޅުވެއެވެ. މިއާއެކު މާލެ ސަރަޙައްދާއި އައްޑޫ ސިޓީއާއި ފުވައްމުލައް ސިޓީއާއި ހައްދުންމަތީގައި އެމްޕީއެލްއިން ދެމުންގެންދިޔަ ބަހުގެ ޚިދުމަތާއި ފެރީގެ ޚިދުމަތް އެމްޓީސީސީގެ ދަށަށް ބަދަލުވާނެއެވެ. މިއީ ސަރުކާރުން ރާއްޖޭގެ ދަތުރުފަތުގެ ނިޒާމު އެއްވިއުގައަކުން ގުޅާލުމަށް ކުރަމުންގެންދާ މަސައްކަތަށް ލިބޭ އިތުރު ކުރިއެރުމެއްކަމުގައި މިދެކުންފުނިންވެސް ފާހަގަކުރައްވައެވެ.