ކަރަން ޖޯހަރްގެ ދަރްމާ ޕްރޮޑަކްޝަނުން އެންމެ ފަހުން ނެރުނު ފިލްމު "ޝޭރުޝާހު" އަށް އަންނަނީ ރަގަޅު ތަރުޙީބެއް ލިބެމުންނެވެ. ސިދާތް މަލޯތްރާ ލީޑްރޯލުން ފެންނަ މި ފިލްމަކީ އިންޑިއަން އާމީގެ ކެޕްޓަން ވިކްރަމް ބަޓްގެ މައްޗަށް އުފައްދާފައިވާ ބަޔޯޕިކް އެކެވެ.
މި ފިލްމަށްފަހު ކަރަން އަނެއްކާވެސް އިތުރު ބަޔޯޕިކް އެއްގެ މަސައްކަތް ފަށަން ތައްޔާރުވާން ފަށައިފިއެވެ.
މިފަހަރުގެ ފިލްމަކީ އިންޑިއާގެ މިނިވަކަމަށް މަސައްކަތްކޮށްފައިވާ އޫޝާ މެހެތާގެ ޙަޔާތުގެ މައްޗަށް އުފައްދާ ފިލްމެކެވެ. އަދި ފިލްމުގެ ސްކްރިޕްޓްވެސް މިހާރު ތައްޔާރުކުރަންމުންދާކަމަށާއި މި ފިލްމު އުފެއްދުމަށް އޫޝާއާއި ބެހޭގޮތުން ރިސާޗްތައް ހަދާތާވެސް ދެތިން އަހަރުވެފައިވާ ކަމަށް ފިލްމުގެ ޕްރޮޑަކްޝަން ޓީމުން ބުނެއެވެ.
ސްކްރިޕްޓް ތައްޔާރުކުރަނީ އަމަތްޔާ ގޮރާޑިއާ އާއި ޕްރިތޭޝް ސޮދާ ލިޔެފައިވާ ޑްރާމާ "ކަރްކަރް" އަސްލަކަށް ބަލައިގެންނެވެ. އިންޓަރ ކޮލެޖް ޑްރާމާ މުބާރާތަކުން މި ޑްރާމާއަށްވަނީ އެންމެމޮޅު ސްކްރިޕްޓް އަދި އެންމެމޮޅު ޑައިރެކްޓަރުގެ އެވޯޑްވެސް ލިބިފައެވެ.
މީގެއިތުރުން މި ފިލްމުގެ ޑައިރެކްޓަރަކަށް ހަދަން ކަރަން ބޭނުންވަނީ "އޭކްތީ ދަޔާން" އަދި "ވިކްޓަރީ" ފަދަ ފިލްމުތައް ޑައިރެކްޓްކޮށްފައިވާ ކަނަން އިޔެރް އެވެ.