އެޕްލޯސް އެންޓަރޓެއިންމަންޓާއި ޝޫ ސްޓްރޭޕް ފިލްމްސް ގުޅިގެން އުފައްދާ ރޮމޭންޓިކް ފިލްމުން ފެންނާނީ ލެޖެންޑްރީ ދެ އެކްޓަރުން ކަމަށްވާ ޑިމްޕަލް ކަޕާޑިއާ އާއި ޕަންކަޖް ކަޕޫރެވެ. ސްޓޭޖް ތަމްސީލެއްގެ މައްޗަށް ސޯރަބް ޝުކްލާ އުފައްދާ މި ފިލްމު ޑައިރެކްޓް ކުރާނީވެސް ސޯރަބް އެވެ. 50 އަހަރު އެކުގައި އުޅުމަށްފަހު ވަރިވާން މަސައްކަތް ކުރާ ދެ މަފިރިއެއްގެ ވާހަކަ ދައްކުވައިދޭ މި ފިލްމަށް ކިޔަނީ "ޖަބް ކުލީ ކިތާބް" އެވެ.
ކައިވެނީގައި ޖެހޭ މައްސަލަތަކުގެ ސަބަބުން އާއިލާއަށް ދިމާވާ ކަންތައްތައް މަޖާ ނަމަވެސް ލޯބި ގޮތަކަށް ފިލްމުގެ ވާހަކަ ގެނެސްދޭނެކަމަށް ޕްރޮޑަކްޝަން ޓީމުން ބުނެއެވެ. އަދި 70 އަހަރުވެފައިވާ ދެމަފިރިން ފުރާވަރު ކުދިންހެން އުޅޭގޮތް ދައްކައިދޭ މި ފިލްމުން ބެލުންތެރިން ހެއްވާލާނެ ކަމަވެސް ޓީމުން ބުނެއެވެ.
ފިލްމު "ބޮބީ" އިން 1973 ވަނަ އަހަރު ފިލްމީ ކެރިއަރ ފެށި ޑިމްޕަލް ވަނީ ހަމަ އެ ފިލްމުން ފިލްމުފެއަރ އެވޯރޑްވެސް ޙާޞިލްކޮށްފައެވެ. ޑިމްޕަލް އެންމެ ފަހުން ފެނިފައިވަނީ މިދިޔަ އަހަރު ދެއްކި ހޮލީވުޑް ފިލްމު "ޓެނެޓް" އިންނެވެ. ޑިޕްމަލް އަކީ ކުރީގެ ދެ އެކްޓްރެސުން ކަމަށްވާ ޓްވިލް ކަންނާ އަދި ރިންކޭ ކަންނާގެ މަންމައެވެ.
އެކްޓަރ ޝާހިދު ކަޕޫރުގެ ބައްޕަ ޕަންކަޖް ކަޕޫރަކީ އެކި ފިލްމުތަކާއި ޓީވީ ޑްރާމާތައްވެސް ކުޅޭ އެކްޓަރެކެވެ. ޕަންކަޖްގެ ފާހަގަކޮށްލެވޭ ފިލްމުތަކުގެތެރޭގައި 1989 ވަނަ އަހަރު ދެއްކި "ރާކް" ، 1991 ވަނަ އަހަރު ދެއްކި "އެކް ޑޮކްޓަރްކީ މައުތް" 2004 ވަނަ އަހަރު ދެއްކި "މެކްބެތް:މަޤްބޫލް" ހިމެނެއެވެ. މި ތިން ފިލްމުންވެސް ޕަންކަޖް ވަނީ ނޭޝަނަލް ފިލްމުފެއަރ އެވޯޑް ޙާޞިލްކޮށްފައެވެ.