ޝާހުރުކްޚާންގެ ކުރިއަށްއޮތް ފިލްމު "ޕަތަންގް" ރިލީޒްކުރުން އަނެއްކާވެސް ލަސްވެއްޖެއެވެ.
އެންމެ ފަހުން ފިލްމުގެ ޝޫޓިންތައް މެދުކަނޑާލާފައިވަނީ ޝާހްގެ ދަރިފުޅު އާރިޔަންޚާންގެ ޑްރަގް ކޭސްއާއި ގުޅިގެންނެވެ. އޭގެފަހުން އަނެއްކާވެސް ކޯވިޑްގެ އައު ވޭރިއަންޓް އޮމިކްރޯންގެ ސަބަބުން ސްޕެއިންގައި ނަގަންޖެހޭ ބައެއް މަންޒަރުތައް ވަނީ މަޑުޖައްސާލަން ޖެހިފައެވެ. ސްޕެއިންގަ ދަނީ ހަލުއިކަމާއިއެކު އޮމިކްރޯން ފެތުރެމުންނެވެ. ޝޫޓިންތައް އަލުން ފެށޭވަރުވާނީ އަންނަ ފެބްރުއަރީގައި ކަމުގައިވެސް ޕްރޮޑަކްޝަން ޓީމުން ބުނެއެވެ.
މިއާއިއެކު ރިލީޒްކުރުމަށް އެތައް ތާރީޚްތަކެއް މީގެކުރިންވެސް ދީފައިވާ މި ފިލްމު ރިލީޒްކުރުން އަނެއްކާވެސް ލަސްވާނެއެވެ.
ސްޕައި ތްރިލަރ އެއްކަމަށްވާ މި ފިލްމުގައި ޝާހުގެ އިތުރުން ދީޕިކާ ޕަޑްކޯން އަދި ޑިމްޕަލް ކަޕާޑިއާވެސް މުހިންމު ރޯލުތަކުން ފެނިގެންދާނެއެވެ.
ބޮކްސް އޮފީހުގައި މާ ބޮޑު ކާމިޔާބެއް ލިބިފައިނުވާ 2018 ވަނަ އަހަރު ދެއްކި އާނަންނަދު ލެހެރާއީގެ ފިލްމު "ޒީރޯ" އަށް ފަހު ޝާހު ވަނީ ފިލްމީ މަސައްކަތްތަކުން ދިގު ބްރޭކެއް ނަގާފައެވެ. 29 އަހަރުގެ ކެރިއަރުގައި މިހާ ދިގު ބްރޭކެއް ޝާހު ނެގި މީ ފުރަތަމަ ފަހަރެވެ.