ދިވެހިރާއްޖޭގެ އަޑުގެ ބެސްޓް ރޭޑިއޯ ޕްރެޒެންޓަރ ކޮންފެޓިޝަންގެ ގަދަ ހަތަރެއް ކަނޑައަޅާ ފައިނަލަށް ދާ ބައިވެރިން ހޮވުމަށް އެސްއެމްއެސް ކުރުމުގެ ފުރުސަތު ހުޅުވާލައިފިއެވެ.
މުބާރާތުގެ ގަދަ ހަތަރަކުން ޖާގަ ހޯދީ މުޙައްމަދު ފަޒީން، މުޙައްމަދު ނަވީން، އައިމިނަތު ބަލްސަމް، މައިޝާ މުޙައްމަދުއެވެ. ފައިނަލުން ޖާގަ ލިބެނީ މިތަނުން ކޮންމެވެސް ތިން ބައިވެރިއަކަށެވެ. މުބާރާތުގެ ގަދަ ހަތަރަކުން ޖާގަ ނުލިބި މުބާރާތުން ވަކިވާން ޖެހުނީ އަޒުކާ ހާމިދު އެވެ.
ސެމީ ފައިނަލްގައި ވާދަކުރާ ހަތަރު ބައިވެރިންގެ ތެރެއިން ފައިނަލަށް ހޮވޭ ބައިވެރިން ހޮވުމަށް އެހުންތެރިންގެ އެސްއެމްއެސް ވޯޓަށް މިހާރު ވަނީ ހުޅުވާލައިފައެވެ. އެސްއެމްއެސް ކުރުމުގެ އެންމެ ފަހު ވަގުތަކީ މާދަމާރޭ ދަންވަރު 12:00 އެވެ.
ބެސްޓް ރޭޑިއޯ ޕްރެޒެންޓަރ ކޮންޕެޓިޝަނަކީ ރޭޑިއޯ ޕްރޮގްރާމް ހުށަހެޅުމުގެ ދާއިރާގައި މަސައްކަތް ކުރާހިތްވާ ޒުވާނުންނަށް އެފުރުޞަތު ފަހިކޮށްދީ، އެފަދަ ޒުވާނުންގެ ހުނަރު ތަރައްޤީ ކޮށްދިނުމުގެ މަޤްޞަދުގައި، މުބާރާތެއް ގޮތަށް ކުރިއަށް ގެންދާ ރިއަލިޓީ ޝޯއެކެވެ. މިއީ މި ސިލްސިލާގެ 4 ވަނަ ސީޒަން އެވެ.
ބެސްޓް ރޭޑިއޯ ޕްރެޒެންޓަރ ކޮންޕެޓިޝަންގެ ޓައިޓްލް ކާމިޔާބުކުރާ ބައިވެރިއަކަށް 20000.00 (ވިހި ހާސް ރުފިޔާ)ގެ ފައިސާގެ އިނާމެއް ވަނީ ކަނޑައަޅާފައެވެ. މީގެއިތުރުން ކޮންޓްރެކްޓް އުސޫލުން 1 އަހަރު ދުވަހު ޕީއެސްއެމްގައި މަސައްކަތް ކުރުމުގެ ފުރުޞަތު ލިބޭނެ އެވެ.
މުބާރާތުގެ 2 ވަނައަށް -/15،000 ރުފިޔާ އަދި ތިންވަނައަށް -/ 10،000 ރުފިޔާގެ ފައިސާގެ އިނާމެއް ދިނުމަށް ވަނީ ހަމަޖެހިފައެވެ.
މުބާރާތުގެ ނަތީޖާ ނެރެނީ ފަނޑިޔާރުންގެ މާކްސްގެ %65 އާ އެހުންތެރިންގެ އެސްއެމްއެސްއަށް %35 ހިމަނައިގެންނެވެ.