ރާއްޖޭގެ ކޮންމެ ރަށަކުން ތިރީސް މިނިޓުން ދަތުރުކޮށްފައި ދެވޭ ހިސާބުގައި އެއަރޕޯޓުތައް ތަރައްޤީކުރުމަކީ ސަރުކާރުގެ މުހިންމު ސިޔާސަތެކެވެ. މިގޮތުން މިވަގުތު އެއަރޕޯޓް ނެތް އެއް އަތޮޅަކީ ފ.އަތޮޅެވެ. އެއަތޮޅުގައި އެއަރޕޯޓެއް ހަދަން މިހާރުވަނީ މަސައްކަތް ފަށާފައެވެ.
ފ.އަތޮޅުގައި 19 ރަށް ހިމެނޭއިރު މީހުން ދިރިއުޅެނީ އެންމެ 5 ރަށުގައެވެ. އަތޮޅުގައި މިވަގުތު އޮޕަރޭޓްކުރަމުންދަނީ އެންމެ ރިސޯޓެކެވެ. އެހެންނަމަވެސް އެއަތޮޅުގައި އިތުރު 5 ރިސޯޓެއް ތަރައްޤީކުރުމުގެ މަސައްކަތް އެކި މަރުޙަލާތަކުގައި މިހާރު ކުރިއަށް އެބަދެއެވެ. އެހެންކަމުން އެއަތޮޅު ފަތުރުވެރިކަމަށް ތައްޔާރުކުރާއިރު އެއަރޕޯޓެއް އޮތުމަކީ މުހިންމު ކަމެކެވެ. ކޮންމެ ތިރީސް މިނިޓަކުން ސްޕީޑު ބޯޓެއްގައި ދެވޭ ހިސާބުގައި އެއަރޕޯޓެއް ތަރައްޤީކުރުމުގެ ސިޔާސަތުގެ ދަށުންވެސް މިއަތޮޅުގައި އެއަރޕޯޓެއް ހަދަން ސަރުކާރުންވަނީ ނިންމަވާފައެވެ. ފ.އަތޮޅަކީ މިވަގުތު ރާއްޖޭގައި އެއަރޕޯޓު ނެތް 3 އަތޮޅުގެ ތެރެއިން އެއް އަތޮޅެވެ.
އެއަތޮޅުގައި އެއަރޕޯޓު ތަރައްޤީކުރުމަށް ހަމަޖެހިފައިވަނީ އެއަތޮޅު މަގޫދޫގައެވެ. އެއަރޕޯޓު ހަދަން ބޭނުންވާ 30 ހެކްޓަރުގެ ބިން ހިއްކުމުގެ ޢަމަލީ މަސައްކަތް މިހާރުވަނީ މަގޫދޫގައި ފަށާފައެވެ. މިމަސައްކަތް ކުރަނީ އެމްޓީސީސީންނެވެ. މަގޫދޫގެ އެއަރޕޯޓާއެކު މުޅި އަތޮޅަށްވެސް ތަރައްޤީ އަންނާނެކަމަށް އެރަށުގެ ރައްޔިތުން ދެކެއެވެ. ޕީއެސްއެމްނިއުސްއާއި ވާހަކަދެއްކި ބައެއް ޢާންމުން ބުނީ މިއީ އެމީހުން އަބަދުވެސް ދެކެން ބޭނުންވި ދުވަހެއްކަމަށާއި އެކަމަށްޓަކާ މުޅި ރަށްވެސް އުފާކުރާކަމަށެވެ.
"އަޅުގަނޑުމެން ވަރަށް ދެކެން ބޭނުންވާ ދުވަހެއް މިސަރަޙައްދުގެ ދަތުރުފަތުރު ރަނގަޅުވުންއެއީ. އެއަރޕޯޓަކަށް ވަރަށް އިންތިޒާރުކުރެއްވިއްޖެ. ބިން ހިއްކާ މަސައްކަތް ފެށުމާއެކު ހުވަފެން ހަގީގަތަކަށް ވުމުގެ ޔަގީންކަން ލިބިގެން މިދިޔައީ." އެރަށުގެ ޢާއްމުންގެ މީހަކު ބުންޏެވެ.
"ރައީސް އަރިހުގައި އެއަރޕޯޓްގެ ވާހަކަދެންނެވީ މިރަށު މީހުން ވަރަށް އުންމީދާއެކު. ހަގީގަތަކަށްވާތަން ފެނުނީމަ މިއަދު މިތިބީ ވަރަށް ބޮޑަށް އުފަލުން" އިތުރު މީހަކު ބުންޏެވެ.
ޢާއްމުގޮތެއްގައި ކަނޑު މަޑު ދުވަހެއްނަމަ ލޯންޗުގައި ދެގަޑިއިރާއި ތިރީސް މިނިޓުން ދަތުރުކުރެވުނުނަމަވެސް ކަނޑު ގަދަ ދުވަސްތަކުގައި ދަތުރުކުރުމަކީ އަތޮޅު ރައްޔިތުން އުފުލަމުން އަންނަ ތަކުލީފެކެވެ. އެއަރޕޯޓް މަޝްރޫޢާއެކު މިކަމަށް ނިމުމެއް އަންނާނެކަން ޤަބޫލުކޮށް އެރަށުގެ ރައްޔިތުން ތިބީ ހިތްހަމަޖެހިފައެވެ.
މަގޫދޫ ބިން ހިއްކުމުގެ މަސައްކަތް އެމްޓީސީސީއާ ޙަވާލުކޮށްފައިވަނީ 206 މިލިއަނަށްވުރެ ގިނަ ރުފިޔާއަށެވެ. މަގޫދޫގައި ޖުމްލަ 48 ހެކްޓަރުގެ ބިން ހިއްކުމަށްވަނީ ހަމަޖެހިފައެވެ. އޭގެ ތެރޭގައި ހިމެނެނީ އެއަރޕޯޓް ޤާއިމުކުރުމަށްޓަކާ ހިއްކާ 30.8 ހެކްޓަރުގެ ބިމާއި ސިނާޢީ މަސައްކަތްތަކަށާއި އިޖުތިމާޢީ ބޭނުންތަކަށް ހިއްކާ 17 ހެކްޓަރުގެ ބިމެވެ. މިމަޝްރޫޢުގެ ދަށުން 3300 އަކަމީޓަރަށްވުރެ ބޮޑު ސަރަޙައްދެއް ޙިމާޔަތްކުރުމަށްވަނީ ހަމަޖެހިފައެވެ. ބިން ހިއްކުމުގެ މަސައްކަތް ނިމުމާއެކު އެއަރޕޯޓު ތަރައްޤީކުރުމުގެ މަސައްކަތް ބަޔަކާ ޙަވާލުކުރުމަށް ސަރުކާރުން އަންނަނީ ތައްޔާރުވަމުންނެވެ.