ބިމުގެ ޖާގައިގެ ދަތިކަމަކީ ރާއްޖޭގެ ބައެއް ރަށްރަށަށް ވަރަށް ބޮޑަށް ކުރިމަތިވެފައިވާ މައްސަލައެކެވެ. އޭގެ ނަތީޖާއެއްގެ ގޮތުން އިޖުތިމާޢީ އަދި އިޤްތިޞާދީ އެތައް މައްސަލަތަކެއްވެސް އަންނަނީ ފެންމަތިވަމުންނެވެ. މިފަދައިން ޖާގައިގެ ދަތިކަން ކުރިމަތިވެފައިވާ އެއްރަށަކީ ފ.މަގޫދޫއެވެ.
އާބާދީގައި 800 އެއްހާ މީހުން ދިރިއުޅޭ ފ.މަގޫދޫއަކީ އެއަތޮޅުގައި މީހުން ދިރިއުޅޭ 5 ރަށުގެ ތެރެއިން ދެވަނައަށް އެންމެ އާބާދީ މަދު ރަށެވެ. އާބާދީ ކުޑަނަމަވެސް މަގޫދޫއަކީ ފަންނުވެރި އަދި ހީވާގި ރައްޔިތަކު ދިރިއުޅޭ ރަށެކެވެ. ރިސޯޓުތަކަށް ކުކުޅު ސަޕްލައިކުރުމާއި ބޭރުގެ ޔުނިވަރިސިޓީއަކާއި ގުޅިގެން ރާއްޖޭގައި ހިންގާ ހަމައެކަނި މެރިން ބަޔޮލޮޖީގެ ބޮޑެތި ދިރާސާތައް ގަވާއިދުން ކުރަނީ މަގޫދޫގައެވެ. ރަށަށް ލިބެން ހުރި އެތައް ފުރުސަތަކަށް ކުރިމަތިވެފައިވާ އެންމެ ބޮޑު ހުރަހަކީ އެކަށީގެންވާ ބިން ނެތުމެވެ.
ޕީއެސްއެމް ނިއުސްއާއި ވާހަކަދައްކަވަމުން ފ.މަގޫދޫ ކައުންސިލްގެ ރައީސް ޢަބްދުﷲ ވަޙީދު ވިދާޅުވީ ރަށުގެ ތަރައްޤީއަށް ޒުވާނުން ކުރިއަށްގެންދަން ބޭނުންވި ބޮޑެތި އެތައް މަޝްރޫޢެއް ހުއްޓާލަންޖެހުމުގެ އަސްލަކީ އެކަމަށް ބޭނުންވާ ބިން ނެތުންކަމަށެވެ. އެހެން ރަށްރަށުގައި ބިން ހުރެ ބިމުގެ ބޭނުން ނުކުރެވުނުނަމަވެސް މަގޫދޫގައި ސިނާޢީ މަސައްކަތެއް ކުރާނެ އަދި ރައްޔިތަކަށް ގޯއްޗެއް ދޭނެ ބިމެއްވެސް ނެތްކަމަށް ކައުންސިލުން ފާހަގަކުރެއެވެ.
"އަޅުގަނޑުމެން މިހާރުވެސް މިދަނީ ރަށުގައި ބިން ހިއްކުމާއެކު ބިމުގެ ބޭނުންކުރުމާއި ގުޅޭގޮތުން އެކުލަވާލަންޖެހޭ އުސޫލުތައް އެކުލަވާލުމުގެ މަޝްވަރާތައް ކުރަމުން. އެހެންކަމުން ބިން ހިއްކާ ނިމުމާއެކު ބިމުގެ ބޭނުން ނުކުރެވި ދޫކޮށްލާ ރަށަކަށް މިރަށެއް ނުވާނެ." ކައުންސިލް ރައީސް ވިދާޅުވިއެވެ.
މަގޫދޫގައި ބިން ހިއްކުމުގެ ޢަމަލީ މަސައްކަތް އެމްޓީސީސީއިން މިހާރު ވަނީ ފަށާފައެވެ. ޖުމްލަ 48 ހެކްޓަރުގެ ބިން މަގޫދޫގައި ހިއްކުމަށްވަނީ ހަމަޖެހިފައެވެ. އޭގެތެރޭގައި ހިމެނެނީ އެރަށުގައި ޤާއިމުކުރާ އެއަރޕޯޓު އެޅުމަށް ބޭނުންވާ 30 ހެކްޓަރުގެ ބިމާއި އިޖުތިމާޢީ އަދި ސިނާޢީ ބޭނުންތަކަށް ހިއްކާ 17 ހެކްޓަރުގެ ބިމެވެ. ދައުލަތުގެ ބަޖެޓުން 206 މިލިއަނަށްވުރެ ގިނަ ރުފިޔާ ޚަރަދުކޮށްގެން ހިންގާ މިމަޝްރޫޢާއެކު މަގޫދޫއަށް ޒަމާނުއްސުރެ ދިމާވެފައިވާ ބިމުގެ ޖާގައިގެ މައްސަލައަށް ޙައްލެއް އަންނާނެކަމަށް ރަށުގެ ޢާއްމުން ދެކެއެވެ.