ސޮނީ ޓީވީން ދައްކާ ކާމިޔާބު ރިއަލިޓީ ޝޯ "އިންޑިއަން އައިޑޮލް" ގެ 13 ވަނަ ސީޒަން ދައްކަން ފަށަން ތައްޔާރުވެއްޖެއެވެ.
ނިމިގެން ދިޔަ 12 ވަނަ ސީޒަންވެސް ހިޓްވެފައިވާ މި ޝޯވގެ އާ ސިޒަންގެ ޕްރޮމޯތައް މިހާރު އަންނަނީ ދައްކަމުންނެވެ. ޝޯވ ފަށާނެ ވަކި ތާރީހެއް އަދި އިއުލާނެއް ނުކުރެއެވެ. ސޮނީ މިހާރު ދައްކާ "ސުޕަސްޓާ ސިންގަރ" ނިންމާލުމަށްފަހު "އިންޑިއަން އައިޑޮލް" ފަށާނެކަމަށް ރިޕޯޓުތައް ބުނެއެވެ.
މިދިޔަ ސީޒަންގައި ޖަޖުންގެ ގޮތުގައި ތިބީ އަނޫ މާލިކް އާއި ސޯނޫ ކައްކަރު އަދި ހިމޭޝްރޭޝް މިޔާ އެވެ. އާ ސީޒަންގެ ޖަޖުންގެ ގޮތުގައި ތިބޭ ބައެއް އަދި ކަށަވަރުނުވާއިރު، ޝޯވގެ 3 ވަނަ އަދި 4 ވަނަ ސީޒަންގައި ޖަޖެއްގެ ގޮތުގައި ފެނުނު ވިޝާލް ދަދްލާނީ ފެންނާނެކަމަށް ޚަބަރުތައް ބުނެއެވެ. ނަމަވެސް މި ވާހަކަ އެއްވެސް ފަރާތަކުން އަދި ކަށަވަރެއް ނުކޮށްދެއެވެ. މިފަހަރުގެ ޝޯވވެސް ހުށަހަޅާދޭނީ ކުރީ ސީޒަންވެސް ހުށަހަޅައިދިން އަދިތްޔާ ނާރަޔަންއެވެ.
2020 ވަނަ އަހަރުގެ ނޮވެމްބަރު 28 ގައި ފަށައިގެން މިދިޔަ އަހަރުގެ އޮގަސްޓް 15 ގައި ފިނާލޭ ގެނެސްދިން "އިންޑިއަން އައިޑޮލް 12" ކާމިޔާބުކުރީ ޕަވަންދީޕް ރާޖަން އެވެ. "އިންޑިއަން އައިޑޮލް" ގެނެސްދޭން ފެށީ 2004 ވަނަ އަހަރުއެވެ.