ރަށްރަށުގެ ކުނި މެނޭޖްކުރުމަށް ގްރީން ފަންޑުން އަންނަ އަހަރު ކައުންސިލްތަކަށް ފައިސާ ދޫކުރުމަށް ސަރުކާރުން ނިންމައިފިއެވެ.
ރަށްރަށުގެ ކުނި މެނޭޖްކުރުމުގައި ދިމާވާ އެންމެ ބޮޑު ދައްޗެއްކަމަށް ކައުންސިލްތަކުން ފާހަގަކުރަނީ އެކަމަށް ހޭދަކުރުމަށް ބޭނުންވާ ބަޖެޓު ނެތުމުގެ ޝަކުވާއެވެ.
ރާއްޖޭގެ ނާޒުކު ވެއްޓަށް ކުރިމަތިވެފައިވާ އެންމެބޮޑު އެއް ނުރައްކަލަކީ ރައްކާތެރިގޮތުގައި ކުނި މެނޭޖްނުކުރެވުމުގެ ނުރައްކަލެވެ. މިމަސައްކަތްކުރުމަށް އެކި ދުވަސްވަރު އެކި ނަންނަމުގައި މަސައްކަތްތަކެއް ކުރެވުނުނަމަވެސް އެކަށީގެންވާ ޙައްލެއް ކުނީގެ މައްސަލައަށް އައިސްފައެއް ނުވެއެވެ. ކައުންސިލްތަކުން ޢާއްމު ގޮތެއްގައި ކުރާ އެންމެބޮޑު އެއް ޝަކުވާއަކީ ކުނި މެނޭޖްކުރުމަށް ހޭދަކުރާނެ ފައިސާ ކައުންސިލްގައި ނެތުމުގެ ޝަކުވާއެވެ. މިކަމަށް ހައްލެއް ގެނެސް އެރަށެއްގައި އުފެދޭ ކުނި އެރަށެއްގައި މެނޭޖްކޮށް ރަށުން ބޭރުކުރަންޖެހޭ ކުނި އެސަރަޙައްދެއްގައި ހުންނަ ސަރަޙައްދީ ކުނި މެނޭޖްކުރާ މަރުކަޒަށް ގެންދިޔުމަކީ ވަށައިޖެހޭ ނިޒާމެއްގެ ތެރެއިން ކުނީގެ މައްސަލަ ޙައްލުކުރުމަށް ސަރުކާރުން ގެންގުޅޭ ސިޔާސަތެވެ.
ލާމަރުކަޒީ ޤާނޫނުގެދަށުން ކުނި މެނޭޖްކުރުމަށް ކައުންސިލްތަކަށް މާލީ އެހީދޭން ސަރުކާރުން ވަނީ ނިންމާފައެވެ. އެމްޑީޕީގެ ކޮންގްރެސްގައި ވާހަކަދައްކަވަމުން މިނިސްޓަރ އޮފް އެންވަޔަރަމަންޓް ކްލައިމެޓް ޗޭންޑް އެންޑް ޓެކްނޮލޮޖީ އާމިނަތު ޝައުނާ ވިދާޅުވީ ގްރީން ޓެކްސްގެ ގޮތުގައި ދައުލަތަށް ލިބޭ ޢާމްދަނީން ކުނި މެނޭޖްކުރުމަށް ބަޖެޓެއް ކަނޑައަޅާ ކައުންސިލްތަކަށް އެފައިސާ ދޭން އަންނަ އަހަރު ފަށާނެކަމަށެވެ. މިއާއެކު ގޭބިސީތަކުން ކުނި ނެގުމަށް ބޭނުންވާ އުޅަނދުތަކާއި އެކަމަށް ބޭނުންވާ އިންސާނީ ވަޞީލަތްތަކާއި ހޯދަންޖެހޭ އެހެނިހެން ވަޞީލަތައް ކައުންސިލްގެ ބެލުމުގެ ދަށުން ހަމަޖެއްސުމުގެ ބާރު ކައުންސިލްތަކަށް ލިބިގެންދާނެއެވެ.
ގްރީން ޓެކްސްއަކީ ދައުލަތަށް އެންމެ ބޮޑު ޢާމްދަނީ ލިބޭ އެއް ޓެކުހެވެ. ރައްޔިތުންގެ މަޖިލީހުގެ މިދިޔަ ދައުރުގައިވަނީ ގްރީންޓެކްސްގެ ގޮތުގައި ނަގާ މިންވަރު އިތުރުކުރުމަށް ނިންމާފައެވެ. އެގޮތުން ރަށްރަށުގައި ހިންގާ ގެސްޓްހައުސްތަކުގެ ތެރެއިން 50 ކޮޓަރިއަށްވުރެ މަދުން ކޮޓަރި ރެޖިސްޓަރ ކޮށްފައިވާ ތަންތަނަށް އަންނަ ފަތުރުވެރިންގެ އަތުން އެތަނުގައި ހޭދަކުރާ ކޮންމެ ދުވަހަކަށް، މީހަކަށް 3 ޑޮލަރު ގްރީން ޓެކްސްގެ ގޮތުގައި ނެގުމަށްވަނީ ހަމަޖެހިފައެވެ.