ރަށުގެ އާބާދީއަށް ބެލުމެއްނެތި ރަށްރަށަށް ބޭނުންވާ ތަރައްޤީގެ އެކި މަޝްރޫޢުތައް އަންނަނީ ހިންގަމުންނެވެ. ރާއްޖޭގެ ހުރިހާ ސަރަޙައްދެއްގައި މިފަދަ ކޮންމެވެސް މަސައްކަތެއް ކުރިއަށްދާއިރު ގއ.ދާންދޫއަކީވެސް މިފަދަ ބޮޑު މަޝްރޫޢުއެއް ކުރިއަށްދާ ރަށެކެވެ.
ދެހާހަށްވުރެ ބޮޑު އާބާދީއެއް އޮންނަ ގއ.ދާންދޫގެ ބިން ފުރި ޢާއްމު އިޖުތިމާޢީ ބޭނުންތަކަށާއި އިޤްތިޞާދީ އަދި ސިނާޢީ މަސައްކަތްތަކަށް ބޭނުންވާ ބިން ނެތުމުގެ ސަބަބުން މީގެ ކުރިންވެސް އެރަށުގެ ފަޅުން ބައެއްވަނީ ހިއްކާފައެވެ. އެހެންނަމަވެސް އިތުރުވަމުންދާ އާބާދީއާއި ރަށަށް ގެންނަން ބޭނުންވާ ތަރައްޤީއަށް ބޭނުންވާ ބިން އެރަށުގައި އަނެއްކާވެސް ފުރިފައިވާކަމަށް ދަންދޫ ކައުންސިލުން ވިދާޅުވެއެވެ. އެހެންކަމުން ކައުންސިލާއި ރައްޔިތުންގެ އެދުމުގެ މަތިން އެރަށު ބިން ހިއްކުމަށް ސަރުކާރުން މިހާރުވަނީ މޯލްޑިވްސް ޓްރާންސްޕޯޓް އެންޑް ކޮންޓރެކްޓިންގ ކޮމްޕެނީއާއި ޙަވާލުކޮށްފައެވެ.
25 ހެކްޓަރުގެ ބިން ހިއްކުމަށް އެމްޓީސީސީއާއި ޙަވާލުކޮށްފައިވަނީ 2020ވަނަ އަހަރުގެ ތެރޭގައެވެ. މީގެ ކުރިން މިމަހުގެ ނިޔަލަށް ބިން ހިއްކުމުގެ މަސައްކަތް އެއްކޮށް ނިންމާލެވޭނެކަމަށް އެމްޓީސީސީއިން މީގެކުރިން ލަފާކޮށްފައިވީނަމަވެސް މަސައްކަތުގައި ދިމާވި އެކި ގޮންޖެހުންތަކާއެކު ދާންދޫ ބިންހިއްކުމުގެ މަސައްކަތަށް ކޮންމެވެސްވަރެއްގެ ލަސްތަކެއްވަނީ އައިސްފައެވެ. މަސައްކަތް ފެށުމުގައި ލަސްތަކެއްވީނަމަވެސް ދާންދޫ ބިން ހިއްކުމާއި ގޮނޑުދޮށް ޙިމާޔަތްކުރުމުގެ މަސައްކަތް މިހާރު ކުރިއަށްދާކަމަށް އެމްޓީސީސީއިން ވިދާޅުވެއެވެ.
ޕީއެސްއެމްނިއުސްއަށް މަޢުލޫމާތުދެއްވަމުން ދާންދޫ ކައުންސިލުން ވިދާޅުވީ މިހާތަނަށް ގާތްގަނޑަކަށް 4 ހެކްޓަރުގެ ބިން ހިއްކިފައިވާކަމަށެވެ. އަދި ރަށުގައި އޮތް ބިމުގެ ޖާގައިގެ ދަތިކަމަށް ހައްލެއް އަންނާތީ އެރަށު ރައްޔިތުން ހިތްހަމަޖެހޭކަމަށް ކައުންސިލުން ވިދާޅުވެއެވެ.
ހުވަދު އަތޮޅު އުތުރުބުރީގައި ދެވަނައަށް އެންމެ ބޮޑު އާބާދީއެއް ދިރިއުޅެމުން އަންނަނީ ދާންދޫއައެވެ. މަސްވެރިކަމުގެ ސިނާއަތުގައި ގިނަ ބަޔަކު މަސައްކަތްކުރާ ދާންދޫގައި، އަމިއްލަ ވިޔަފާރިތައް ކުރިއެރުވުމަށްވެސް ބިން މުހިއްމުކަމަށް ދާންދޫ ކައުންސިލުން ފާހަގަކުރައްވައެވެ. އެހެންކަމުން އެރަށުގެ ފަޅުން އަލަށް ހިއްކަމުންދާ 25 ހެކްޓަރުގެ ބިމާއެކު ދާންދޫގައި އިޤްތިޞާދީ ޙަރަކާތްތައް އިތުރުވެގެންދާނެކަމަށް ކައުންސިލުން އުއްމީދުކުރެއެވެ.
ދާންދޫ ފަޅުން 25 ހެކްޓަރުގެ ބިން ހިއްކާ އެސަރަޙައްދު ޙިމާޔަތްކުރުމަށް 1238 މީޓަރުގެ ބޮޑުހިލައިގެ ތޮއްޓަކާއި 240 މީޓަރުގެ ހުރަސްތޮއްޓެއްލުމަށްވަނީ ހަމަޖެހިފައެވެ. ދާންދޫ ބިންހިއްކާ އެސަރަޙައްދު ޙިމާޔަތްކުރުމަށް ދައުލަތުގެ ބަޖެޓުން 186.6 މިލިއަން ރުފިޔާ ޚަރަދުކުރުމަށްވަނީ ނިންމާފައެވެ.