އޮކްޓޫބަރު މަހުގެ ހަތް ވަނަ ދުވަހުން ފެށިގެން ޔަހޫދީ ފައުޖުތަކުން ފަލަސްޠީނުގެ ޣައްޒާއަށް ދެމުންދާ ޢުދުވާނީ ޙަމަލާތަކުގައި މިހާތަނަށް 100އަށްވުރެ ގިނަ ނޫސްވެރިން ޝަހީދުކޮށްލައިފިއެވެ.
ޔަހޫދީންގެ ޙަމަލާތަކުގައި އެންމެ ފަހުން ޝަހީދުކޮށްލައިފައި ވަނީ ފަލަސްޠީނުގެ ނޫސްވެރިޔާ މުހައްމަދު އަބޫ ހުވައިދީއެވެ. އޭނާ ޝަހީދުކޮށްލީ ޔަހޫދީ އިސްތިޢުމާރީ ފައުޖުން ދިން ވައިގެ މަގުން ޣައްޒާ ސިޓީގެ އިރުމަތީގައި ހުންނަ އޭނާގެ ގެއަށް ދިން ޙަމަލާއެއްގައެވެ.
އިންޓަރނޭޝަނަލް ފެޑެރޭޝަން އޮފް ޖާރނަލިސްޓުސްގެ ޑެޕިއުޓީ ޖެނެރަލް ސެކްރެޓަރީ ޓިމް ޑޯސަން ވިދާޅުވި ގޮތުގައި ގިނަ ޢަދަދެއްގެ ނޫސްވެރިން ޝަހީދުކުރުމަކީ ބިރުވެރި އަދި އަޅާނުލައި ދޫކޮށްލެވޭވަރުގެ ކަމެއް ނޫން ކަމަށެވެ.
ޔަހޫދީންގެ ޙަމަލާތަކުގައި ޣައްޒާގެ 50އަށްވުރެ ގިނަ ނޫސް އިދާރާ ވަނީ ސުންނާފަތިކޮށް ބިމާހަމަކޮށްފައެވެ. ފަލަސްޠީނުގެ އެތައް ސަތޭކަ ނޫސްވެރިންނާއި އެ މީހުންގެ ޢާއިލާތަކަށް ޣައްޒާގެ ދެކުނަށް ބަދަލުވުމަށް ވަނީ މަޖުބޫރުކޮށްފައެވެ. ޣައްޒާއިން ދޭތެރެ ދޭތެރެއިން މުވާސަލާތުގެ ޚިދުމަތް ކަނޑާލައި ނޫސްވެރިން މަޢުލޫމާތު ގެނެސްދޭން ގެންގުޅޭ ސާމާނު ގަދަކަމުން އަތުލުން ފަދަ ކަންކަން ޔަހޫދީން ވަނީ ހިންގައިފައެވެ.
ފަލަސްޠީނުގެ ނޫސްވެރިން ބުނާގޮތުން ޔަހޫދީން އެ ފަދަ ޢަމަލުތައް ހިންގަނީ ނޫސްވެރިންނަށް އަމާޒުކޮށް ގަސްދުގައެވެ. އެއީ ޔަހޫދީންގެ ޖައްބާރު ޢަމަލުތައް ދުނިޔެއަށް ދެއްކުން ހުއްޓުވުމުގެ ގޮތުން ކުރާ ކަމެއް ކަމަށްވެސް ނޫސްވެރިން ބުނެއެވެ.
ނޫސްވެރިންގެ އިތުރުން ޔަހޫދީންގެ ޙަމަލާތަކުގައި މިހާތަނަށް ފަލަސްޠީނުގެ 20،000އަށްވުރެ ގިނަ މީހުން ވަނީ ޝަހީދުކޮށްލައިފައެވެ.